Conmoción na música asturiana pola muerte d'Aurelio Argel

|

El periodista y escritor yera especialista en música folk d'Asturies y otros países.

El sábadu finaba a los 55 años d'edá Aurelio Argel por aneurisma d'aorta, una noticia que conmocionó a la música asturiana. Natural de Soto Rei, foi dende les ondes radiofóniques y les páxines d'espublizaciones como Les Noticies o 'Asturies. Memoria encesa d'un país', de la Fundación Belenos, un divulgador de la música del país.

El so programa 'Música para raptar princesas', de Los 40 Principales, foi especialmente popular. Tamién dirixó 'El ruxideru', espaciu en llingua asturiana de la SER, y foi xuráu del Liet International o del programa 'Cantadera' de TPA.

Un exemplu del ciñu que-y tenía'l mundu de la música asturiana foron les munches muestres d'afeutu que recibió tanto nel so funeral como en redes sociales de músicos y xente venceyada a la cultura. Especialmente emotiva foi la so despidida na ilesia de San Pedro, en Ferreros, cola interpretación de la 'Marcha d'Antón El Neñu', como yera'l so deséu, por gaiteros del nivel de José Manuel Tejedor y el so hermanu Javier, Iñaki Santianes, Pedro Pangua o Vicente Prado 'El Pravianu', ente otros.

Contador Estadistiques