“L’estáu federal ye’l marcu de futuru”, asegura Barbón

El presidente Adrián Barbón insistió esti llunes na so apuesta por avanzar hacia un estáu federal. “Lo que nos amosó la pandemia ye que ye’l marcu de futuru”, aseguró’l socialista, qu’acudió a Ḷḷuarca a la inauguración de la sede xudicial nueva de Valdés, primera con tola cartelería billingüe, a esceición del nome de la fachada.

“Necesitamos deprender a funcionar como un estáu federal”, apuntó a entruges de los medios, pa depués afimar que “lo que nos amosó la pandemia a los que tamos a favor d’un estáu federal en serio, con distribución de competencies, con marcu competencial, con una Conferencia de Presidencia que funcione de verdá, con un orde del día, con convocatories programaes y con capacidá d’alcuerdu, ye que ye’l marcu de futuru”. Nesi sen, apuntó que “cogobernanza ye asumir que, nun ámbitu federal, tenemos que ser quienes d’alcordar ente toos”, y recordó la so posición nun primer momentu del andanciu “de federalizar el funcionamientu del Estáu” y que’l Sistema Nacional de Salud dexara de funcionar como órganu que diera recomendaciones y que tomara decisiones en salú pública de manera cooperativa.

El socialista desplazóse a Ḷḷuarca pa inaugurar la sede xudicial nueva de Valdés, edificiu asitiáu na cai Margarita Salas, en Viḷḷar, nuna parcela de 5.073 metros cuadraos. Da serviciu a los vecinos de Valdés, Bual, Cuaña, Eilao, Navia y Villayón y sustitúi a unes instalaciones con nula accesibilidá al tar nun primer pisu d’un bloque d’edificios.

Amás, ye’l primer inmueble xudicial que cuenta con tola cartelería, tanto esterior como interior, en castellanu y asturianu, sacante’l nome de la fachada, qu’en lletres grandes lluz ‘Sede Judicial’. La so superficie útil son 800 metros cuadraos, con espacios independientes pa les oficines del xulgáu y del rexistru; despachos pa la xueza y el lletráu; sales de vista, polivalente, de reconocimientu y pa abogaos y procuradores; clínica forense; zona de deteníos; calabozu; y archivos, y nestos cinco primeros meses d’añu yá acoyó 200 xuicios.

Semeyes obra d'Armando Álvarez.