“La evolución natural del estáu autonómicu ye'l federal”, diz Barbón

Adrián Barbón participó’l llunes nel Euskalduna Jauregia, en Bilbao, xunto con Idoia Mendia y María Chivite, nuna mesa redonda entamada pol PSE-EE con motivu de los actos del 135 aniversariu de la fundación de la primer agrupación socialista d'Euskadi. Nel alderique, baxo’l títulu de ‘Cumplimos con la cogobernanza’, el llavianés afirmó que “la evolución natural del estáu autonómicu ye l’estáu federal”.

Llueu de les pallabres de la secretaria xeneral del PSE-EE y vicelehendakari y de la presidenta de Navarra, Barbón principió recordando la conexón histórica del socialismu vascu y asturianu, citando nomes como los d’Eduardo Varela, Francisco Cadavieco o Indalecio Prieto, ente otros. “Tamos nun periodu onde hai amenaza seria d’involución pa la construcción autonómica y los pasos hacia la federalización del Estáu, que ye no que nós creemos y polo que nós trabayamos”, arrancó’l socialista, qu’aseguró que “más de 40 años de llibertá, de paz y de crecimientu económicu foron consecuencia direuta precisamente de lo que representa l’estáu autonómicu”.

“Poro, non sólo lu defendemos, sinón que dicimos qu’hai qu’afondar nél”, señalando darréu que “si queremos garantizar un futuru pa España como proyeutu común, pasa por asumir la diversidá territorial y pasa por afondar na federalización del Estáu”. “La evolución natural del estáu autonómicu, non una rectificación, ye l’estáu federal al que tien qu’avanzar el nuesu país”, una reflexón que la pandemia-y fixo ratificar entá más, confesó.

"Envidia sana" de la cogobernanza alemana

El presidente d’Asturies reconoció que les comunidaes autónomes, al igual que’l Gobiernu estatal, tuvieron que tomar decisiones difíciles, “y tomar decisiones significa asumir les crítiques”; decisiones “que teníen siempre una máxima, salvar vides, porque salvar una vida nun tien preciu”. Asina, afirmó que “la reanimación de la economía pasa siempre pola garantía de la salú pública”, amosándose nesti puntu críticu col PP pola falta de coherencia que caltuvo nestos meses de pandemia y reconociendo una “envidida sana” pola cogobernanza alemana.

“La cogobernanza nun nos priva de derechos, ye mentira”, siguió’l llavianés, y “contribúi a arriquecer el proyeutu común, que ye España, dientro d’un proyeutu común entá más ampliu, que ye Europa”. “Agora qu’abrimos el camín, tenemos qu’afondar nella y nes rellaciones, non sólo col Gobiernu d’España, sinón tamién ente les propies comunidaes autónomes. Tenemos que facer normal lo que ye normal nos estaos federales”, aseguró darréu, pa recordar que “cogobernar ye decidir, y decidir ye asumir responsabilidaes; y asumir resposabilidaes ye asumir el desgaste d’una decisión si ún ta convencíu que l’adopta pola garantía de la proteición de la salú, nesti casu, y faciendo casu a los científicos y los que más saben, epidemiólogos y salú pública”.

Pa finar, cargó contra “los que busquen la involución”, emponderó l’estáu autonómicu “que xeneró riqueza, futuru y esperanza”, y aseguró que “vamos ser defensores ensin complexos de la federalización del estáu, de trabayar xuntos; de ser dende la diversidá y construyir un proyeutu muncho más ampliu”.

Na imaxe, Barbón, Mendia y Chivite. Semeya propiedá de Socialistas Vascos.