L’Estatutu d’Autonomía cumple 35 años

|
Declaración institucional 35 años del Estatutu Xunta Xeneral

El 30 d’avientu del 1981 el rei d’España, Juan Carlos I, firmó en Baqueira-Beret la Llei orgánica d'Estatutu d’Autonomía d’Asturies, que saldría espublizada nel BOE del 11 de xineru. La Xunta Xeneral fixo esti vienres, nel Plenu nel que s'aprobaron los presupuestos, una declaración institucional por motivu d’esta efeméride.

Esta declaración, aprobada por asentimientu de todos los miembros de la Cámara, reafirma la so condición de "instrumentu xurídicu básicu que nos ha de servir p’algamar más desarrollu, menos desigualdaes y más xusticia social dientro del marcu de mayor cohesión nacional qu’afita la Constitución". D’igual forma destaca que l’Estatutu "fixo posible la convivencia, el desarrollu políticu, social y económicu" del país, asina como la recuperación de les instituciones y símbolos históricos.

Iniciativa pol Asturianu, pela so parte, aprovechó esta xornada pa recordar la marxinación grave que vivió la llingua asturiana, asina como’l gallego-asturiano, cola modificación en Madrid del testu aprobáu nun primer momentu n’Uviéu, qu’afeutó al desarrollu llexislativu del idioma nes trés décades siguientes. Esto ye que’l primer testu, pese a nun recoyer la oficialidá, afitaba al asturianu como “llingua específica d’Asturies”, pallabres que nun se recoyíen nel definitivu, “dexando al asturianu ensin una definición clara de lo que ye nel Estatutu d’Autonomía y polo tanto, fuera del amparu llegal que da a les llingües la Constitución”.

“La razón d’esta fras borrada del Estatutu ta clara. Si yá la redacción actual del Estatutu podría dar pie a inconstitucionalidá del testu por nun-y dar el rangu d’oficialidá a la llingua asturiana, tal y como afita la Constitución, non como posibilidá, sinón como mandatu, una redacción como aquella aprobada n’Asturies nel 1981, diba permitir que’l Tribunal Constitucional pudiere reconocer, si esistiera una reclamación d’un terceru, la necesidá d’oficializar una llingua reconocida como tala, nel Estatutu”, esplica la organización que trabaya pola normalización del idioma nun artículu entituláu ‘35 años d’un robu llegal a la llingua asturiana’ espublizáu nel 2015 y recuperáu güei.

AdxuntuTamañu
PDF icon estatutu_dautonomia_dasturies_1981.pdf609.26 KB
Contador Estadistiques