L'esmolecimientu medra: 166 y 177 contaxos de COVID-19 rexistraos nes xornaes de Reis

Asturies recupera'l zarru perimetral tres l'apertura pa familiares y allegaos en Navidá.

La evolución de la pandemia de COVID-19 nun ta siendo bona, lo que ta faciendo medrar l'esmolecimientu de les autoridaes sanitaries. A falta de la espublización de los datos oficiales, la Conseyería de Salú informó de 166 contaxos el martes y de 177 ayeri, les dos xornaes de Reis.

La incidencia sigue xubiendo, asitiándose a 7 díes en 84,08 por cada 100.000 habitantes, medra que se da tamién en mayores de 65 años (59,70 casos), asitiándose nesti rangu d'edá a niveles del 8 d'ochobre col doble d'ocupación na UCI que naquelles feches. Tamién aumenta la positividá a 7 díes, que ta nel 5,90 por cientu, yá superior a la llende del 5 por cientu que marca la Organización Mundial de la Salú (OMS) pa tener controlada la pandemia.

Nes dos xornaes últimes hebo que llamentar 8 muertes: 2 el martes y 6 ayeri. Dende qu'entamó l'andanciu, 1.376 persones finaron cola enfermedá causada pol coronavirus SARS-CoV-2.

Hai hospitalizaes 191 pacientes con confirmación o sospecha de COVID-19, 10 más que'l martes. Mentes, siguen 62 na UCI.

Otra manera, una vegada finaes les fiestes navidiegues, torna'l zarru perimetral del país, abiertu dende'l 23 d'avientu hasta ayeri pa familiares y allegaos. Hasta avisu nuevu, salvo por causes de máxima necesidá, los ciudadanos nun van poder salir d'Asturies nin entrar.