La desigual alministración de la vacuna nel Estáu

Asturies punxó'l 100 por cien de les recibíes cuando otres autonomíes nun lleguen al 10. Esti llunes rexistráronse 135 contaxos.

La campaña de vacunación contra la COVID-19 dexa datos sorprendentes na primer selmana. Asturies, qu'apuesta por dedicar les primeres dosis dafechu a los grupos de mayor riesgu, los mayores que viven en centros residenciales, en llugar de reservar la metá pa garantizar la segunda necesaria pa garantiza inmunidá si hubiere una falta de suministru que nun s'espera, ayeri yera'l territoriu onde más s'alministraron, un 80,7 por cientu, siguíu de Galicia, con un 52,8 por cientu, anque'l presidente Adrián Barbón anunciaba na 'SER' qu'esta mañana escosárense les 12.020 recibíes y yá taben coles de la segunda tanda, 11.700 más.

El restu nun llegaba a la metá, tando la media estatal nun 25,59 por cientu. Cantabria, con un 5,2 por cientu; la Comunidad de Madrid, con 6,3; y Estremaúra, con un 7, presenten les peores cifres.

Dos finaos

A la espera de conocer los datos oficiales de la COVID-19 d'ayeri, la Conseyería de Salú comunicó 135 positivos, mesma cantidá que'l domingu. La tasa de positividá na xornada quedó nun 5,26 por cientu tres la realización de 3.154 pruebes de diagnósticu d'infeición activa.

Mentes, hebo que llamentar la perda de dos persones, dos homes de 90 y 89 años, que ponen el total de muertes dende qu'entamó l'andanciu en 1.368. El númberu d'hospitalizaos na xornada queda en 181 con confirmación o sospecha de COVID-19, 7 menos que'l domingu, a los qu'hai que sumar los 62 que siguen na UCI.