"Les tradiciones si nun se caltienen, piérdense", asegura Barbón

El presidente, qu'agradeció'l llabor d'El Cencerru na recuperación de la mazcarada, acudió a Bimenes al Domingu de Sidros y Comedies.

El sol acompañó ayeri una xornada de munchu ambiente en Santuyano. Yera una cita especial, con sidros otra vuelta dando blincos y faciendo trastaes pel conceyu y la representación de les comedies 'Valdesoto ye real', de Fani Moro, que pon n'escena la mocedá de l'Asociación pola Recuperación de los Sidros y les Comedies ‘El Cencerru’; y '¿De qué facemos la comedia?', de José Ramón Oliva, protagonizada polos adultos.

Ente'l públicu, un espectador bien conocíu por tolos presentes: el presidente del país, Adrián Barbón. El llavianés, que yá tuviera l'añu pasáu en Bimenes y qu'escusó'l nun poder tar en Valdesoto nel Domingu de Sidres y Comedies celebráu'l 7 de xineru, confirmando la so intención d'acudir a la celebración del añu qu'entra, agradeció'l trabayu de recuperación d'El Cencerru, "porque les tradiciones si nun se caltienen, piérdense", y apuntó qu'esta mazcarada d'iviernu "tien muncho de representación de la identidá asturiana, d'esa identidá que yo siempre reivindico, d'esi asurianismu y cultura nuestra que nun hai que refugar, sinón qu'hai que protexer y cultivar".

Na semeya, Barbón en compañía d'un sidru.