Les térmiques asturianes valtaron dafechu les emisiones conseñaes en protocolu de Kyoto

7 de les 44 industries asturianes sometíes al control del protocolu de Kyoto perpasaron les cuotes que teníen asignaes nel primer añu de vixencia del documentu qu'apauta les emisiones contaminantes a l'atmósfera de les empreses de tolos estaos compromisarios.

El Ministeriu de Mediu Ambiente regula'l funcionamientu d'esti mercáu, que tien por puntu de partida'l Plan Nacional d'Asignación (PNA) vixente hasta l'añu 2007 y que-y permite a cada industria una cantidá determinada d'emisiones. Acordies colos datos del balance de 2005, nel conxuntu español, que tenía conseñaes 171,9 millones de tonelaes de CO2 rexistráronse a la fin 182,8 millones de tonelaes, colo que se perpasó nun 6,3% el tope, polo que foi preciso pagar derechos pa 11 millones de tonelaes a razón de 30 euros la tonelada.

No tocante a Asturies, foron les grandes centrales térmiques de carbón les que más s'alloñaron de los topes del PNA, rescamplando'l casu de la central térmica de Lada (Llangréu) que tenía permisu pa unes emisiones de 560.186 tonelaes y que rexistró 2.837.088, una cantidá que multiplica por 5 la so cuota. Tamién se desmandaron les centrales d'HC n'Aboño, qu'emitieron el triple de tonelaes de CO2 de les que-y correspondíen asitiándose les sos emisiones en 5.766.293 tonelaes de dióxidu de carbonu cuando se-yos conseñaren 2.182.752, y la central de La Ribera, tamién d'HC y que perpasó en 4.002.337 tonelaes de CO2 la cuota apautada por Mediu Ambiente. El desfase contaminante de les centrales d'HC obligó a la compañía a mercar derechos amestaos d'emisión, que supunxeron una mengua del 70% nel beneficiu del exerciciu. Nenguna de les centrales térmiques asturianes cumplió los sos mandaos pa con Kyoto, y asina la central d'Unión Fenosa en Cangas del Narcea emitió cerca de 3 millones más de tonelaes de lo que se-y permitiere.

Les térmiques de carbón asturianes foron de les fábriques más contaminantes d'Asturies y d'España, siendo de les que más parte de responsabilidá tienen en qu'España nun llograre los oxetivos de Kyoto nesti primer añu. Sicasí, la industria siderúrxica asturiana portóse meyor de lo que se contaba, siendo que, anque l'avilesina Sidergas perpasó les emisiones concedíes, les fábriques d'Arcelor emitieron mui perbaxo de les cuotes permitíes, esactamente 3,3 millones de tonelaes menos de CO2.