Les Regueres ye'l conceyu númberu 61 n’oficializar la so toponimia tradicional

El Conseyu de Gobiernu dio esti martes el preste al decretu toponímicu de Les Regueres. A la espera de la espublización del mesmu nel BOPA, esti conceyu va convertise nel 61 n’oficializar la so toponimia tradicional en sustitución de la castellana.

Les Regueres toma’l relevu de Villayón, qu’en xunu finaba col procesu, y aumenta la llista de conceyos que recuperen los nomes de llugar de tola vida. Quedaríen por aprobar los decretos topínimicos de 17 de los 78 conceyos asturianos, de los que 7 tiene el procesu mui adelantáu: Uviéu, Cabrales, Llanera, Castropol, Cuaña, Onís y Somiedu.

En distintes fases tán los restantes, esto ye, Cuideiru, Ayande, Caravia, Ibias, El Valle Baḥu de Peñamellera, Salas, Navia, Pravia y Muros, amás d’Eilao, entovía en procesu d’entamu. Tres el preste del Conseyu de Gobiernu d’esta mañana, el decretu toponímicu va salir espublizáu nel BOPA nos díes próximos, momentu nel qu’estos topónimos yá van pasar a ser los oficiales.