Les quemes intencionaes siguen provocando indignación, mieu y dolor

El monte d'Asturies ambura, con cases afeutaes y vecinos desallugaos: hai 91 focos activos. Valdés, onde tuvo cortada l'autovía, centra los esfuercios de desaniciu del fueu y asistencia.

Nun foi una nueche tranquila pa les asturianes y asturianos, sobre manera pa los habitantes de los conceyos afeutaos poles quemes, la mayor parte intencionaes, como confirmen les autoridaes. Munchos, cuasi 400 persones, viéronse obligaos a abandonar los sos llares pola cercanía de les llamaraes y les díficiles condiciones, marcaes por un fuerte aire que llevó'l golor a quemao hasta poblaciones alloñaes de los focos, como Xixón.

Valdés concentra les actuaciones de desaniciu y asistencia, con movilización de Bomberos d'Asturies, efeutivos de la Unidad Militar de Emergencias (UME), la Brigada de Refuerzu de Quemes Forestales de Tinéu y de Tabuyo del Monte (Lleón), y una Brigada de Llabores Preventivos del Ministeriu de Transición Ecolóxica y el Retu Demográficu. Hai delles víes de comunicación cortaes nel conceyu valdesanu y, per unes 12 hores, hasta pasaes les 11, nun se permitió'l pasu per l'Autovía del Cantábricu al altor de Cadavéu, población onde tamién se zarró'l tráficu ferroviariu y una gasolinera viose afeutada pol fueu.

A les 10.10 hores taben contabilizaos 121 focos nel país, cifra que baxó a 91 a les 13.20 hores. A esa hora taben activaos los dos hidroaviones FOCA del ministeriu y un helicópteru del Serviciu d'Emerxencies del Principáu d'Asturies (SEPA) p'actuar en Valdés.

Fueu n'El Monte Naranco y a la espera del agua esta madrugada

Uviéu nun se llibra de les quemes. El Monte Naranco foi víctima d'una quema, tamién intencionada, que sigue incontrolable a les puertes de la ciudá, obligando a desallugar a 75 vecinos de Fitoria.

La previsión meteorolóxica da agua esta madrugada, única vía pa desaniciar el fueu dada la situación actual de munchos focos. Mientres, l'esfuerciu va concentrase en salvar vides y viviendes en peligru.

Na semeya, quema en Valdés vista dende Muanes.