“Les polítiques comunitaries sobre llingües minoritaries dan munches posibilidaes”, destaca González Riaño

|
“Les polítiques comunitaries sobre llingües minoritaries dan munches posibilidaes”, destaca González Riaño

“Foi un viaxe mui provechosu”, afirma Xosé Antón González Riaño sobre la visita fecha al Parllamentu Européu’l martes. En Bruxeles el presidente de l’ALLA pudo conocer de primer mano polítiques comunitaries sobre llingües minoritaries que “dan munches posibilidaes”; éstes han de ser solicitaes pol Gobiernu.

Foi la representante de la Direición Xeneral de Cultura de la Comisión Europea, la húngara Petri Bernadette, la que treslladó a la delegación de l’Academia de la Llingua Asturiana (ALLA), formada por González Riaño y María Cristina Valdés, los munchos y variaos programes qu’ufre la Xunión Europea nel campu de les llingües minoritaries, “sobre manera en temes de mocedá”, destaca’l profesor universitariu. “Quedamos abrumaos con toles posibilidaes qu’ofrece, pero una institución como la de nueso nun pue solicitalos. Ha de ser el Gobiernu asturianu'l que los solicite”, esplica.

Ente los munchos programes que-yos presentó nel alcuentru Bernadette, Riaño citó “les ayudes pal intercambiu d’estudiantes de Secundaria y Universidá ente comunidaes con llingua propia pa que conozan otres realidaes sociales, nacionales y llingüístiques”. Tamién “los programes pa la divulgación de les llingües minoritaries naturales de la Xunión Europea” o “los proyeutos culturales de dignificación de la música, lliteratura y tradición”, una ufierta “inabarcable que busca venceyar la cultura europea coles llingües minoritaries que vien acompañada de contribuciones económiques importantes”.

Visita de Torvalds a Asturies

L’otru alcuentru destacáu de la delegación asturiana foi con Nils Torvalds, presidente del Intergrupu de Minoríes Tradicionales, Comunidaes Nacionales y Llingües del Parllamentu Européu. “Foi un conceyu mui interesante. Interesóse muncho pola situación del asturianu, amosó un gran conocimientu sobre’l marcu constitucional español y entrugónos por qué pasaba eso n’Asturies”, resumió González Riaño.

Torvalds recibió de parte del presidente de l’ALLA, al igual que Bernadette y dellos eurodiputaos, un informe ellaboráu a costafecha pa esta visita. “Ta fechu n’inglés y n’asturianu, pa que pudieren comparar el nuesu idioma con otres llingües romániques como’l portugués, italianu y frances. Espeya un poco la situación de la llingua asturiana d’una forma divulgativa”, esplica, centrándose n’aspeutos históricos, llegales y sociolóxicos.

Amás, González Riaño convidólu a visitar Asturies nos meses próximos “pa mostra-y la realidá llinguística y cultural” del país, dalgo que’l finlandés aceptó con gustu. Asina, la selmana qu’entra l’ALLA va unvia-y un documentu con una axenda sobre les visites previstes, que seríen “a l’Academia, la Universidá d’Uviéu y un centru escolar, amás de conceyos colos grupos parllamentarios”, adelanta’l presidente.

La visita a Bruxeles, que foi posible gracies a un ofrecimientu d’Ángela Vallina, eurodiputada asturiana de La Izquierda Plural, coalición na que diba Izquierda Xunida (IX) –el so coordinador xeneral n’Asturies, Ramón Argüelles, tamién se desplazó a Bélxica–, completóse con una reunión col restu d’eurodiputaos asturianos o representantes del so equipu (Jonás Fernández Álvarez, del PSOE; y Tania González Peñas y Estefanía Torres, de Podemos). “Tratóse d’una entrevista que se desendolcó nun bon clima, con munchu interés de la so parte”, destacó.

Na semeya, Torvalds, González Riaño y Valdés.

Contador Estadistiques