Les obres nos accesos al HUCA dende l'AS-II obliguen a esvíos en direición a Xixón

La modificación del tráficu va comenzar esti miércoles y va allargase cuatro meses.

L'avance de les obres de construcción de los accesos al Hospital Universitariu Central d’Asturies (HUCA) dende l’AS-II, l'autovía que sigue'l trazu de la carretera vieya ente Uviéu y Xixón, va obligar a esviar el tráficu que circula en direición a la población asitiada na mariña. A partir de mañana, y nos cuatro meses vinientes, los vehículos van ascender hacia la rotonda superior del enllaz de La Corredoria pa volver incorporase depués a la calzada de l’autovía pel ramal d’accesu.

Esta selmana van instalase paneles de señalización del corte, tanto na AS-II como en La Corredoria. Pa garantizar un tráficu más fluyío, l’accesu dende la rotonda a La Corredoria y al HUCA va quedar cortáu, polo que s'aconseya usar víes alternatives, como la conexón de Llugones (salida 4 de l’autovía) o l’enllaz de La Venta’l Gallu (xunión cola AS-17), pa siguir el trayeutu peles cais de La Corredoria de Riba y La Corredoria de Baxo.

40 por cientu executáu

Esti esvíu del tráficu vien pol comienzu de los trabayos de cimentaciones y alzaos de la estructura que sobrevuelen l’autovía. La construcción de los accesos al HUCA dende l’AS-II tien un presupuestu de más de 8,4 millones y un plazu calculáu de 24 meses.

Hasta agora executóse’l 40 por cientu de la obra (3,4 millones), en concreto la rotonda de desembarcu del enllaz na cai Aguamiera, les árees de trabayu pal remate de los tableros de les estructures metáliques, les cimentaciones fondes y los alzaos de les estructures del enllaz ente l’autovía y la rotonda de desembarcu. Anguaño tán construyéndose los murios de tierra armao del estribu frontal de la estructura de desembarcu.

Imaxe d'Artemimin baxo llicencia CC BY-SA 3.0.