Les mázcares desapaecen de les cares n'esteriores, pero non de los bolsos

Esti sábadu fina la obligatoriedá del so usu. El xueves rexistráronse 93 casos nuevos y hebo que llamentar la muerte d'una muyer de 83 años.

L'aprobación de un Real Decretu-Llei pol que se modifica la redaición del artículu 6 de la Llei 2/2021 que regula l'emplegu de mázcares lleva a una flexibilización de la mesma. En concreto dexen de ser obligatories n'espacios al aire llibre siempre que se pueda caltener una distancia mínima de polo menos 1,5 metros ente persones, sacante grupos de convivientes.

La midida entra a valir esta medianueche y permite que se puedan otra vez cares peles cais, anque nun va suponer el fin de la mázcara, yá que siempre va haber que llevar una en bolsu. Y ye que va siguir siendo obligatoria en cualesquier espaciu zarráu o nos llugares abiertos al públicu, inclusive les terraces de los chigres, y n'eventos multitudinarios como conciertos o espectáculos deportivos.

La mázcara sí va desapaecer en residencies siempre que'l 80 por cientu de los sos usuarios tea vacunáu, a esceición de los trabayadores y visitantes, qu'han llevales en tou momentu. Otra manera, el Gobiernu eliminó l'apartáu 2 del artículu 15, referente a competiciones deportives, lo que va permitir que tanto LaLiga como l'ACB pueda acoyer públicu la temporada próxima nel aforu que marquen les comunidaes autónomes.

Una tasa de positividá diaria del 5,33

A falta de la espublización de los datos oficiales de la COVID-19, la Conseyería de Salú comunicó la detección ayeri de 93 casos nuevos –l'actualización resta 3 por duplicaos en díes anteriores–. Ye la cantidá más alta dende'l 29 d'abril, cuando s'informaron 112, anque una revisión redúxolo a 110.

Fixéronse 1.990 pruebes de diagnósticu d'infeición activa, polo que la tasa de positividad s'asitió nel 5,33 por cientu. A 7 díes esti porcentaba taba enantes de l'actualización nun 3,23 por cientu –ayeri xubió al 3,43 por cientu–.

Estos malos datos sumáronse tamién a la murnia noticia de la muerte d'una muyer de 83, la 1.979 del andanciu y la octava del mes. Dende'l sábadu nun se rexistraba fináu nengún.

Hai 47 pacientes hospitalizados con confirmación o sospecha de COVID-19, 1 menos que'l miércoles, mentes que na UCI la cifra d'ingresaos caltiénse en 13.