Les directrices nueves del territoriu van protexer les cases tradicionales

El derribu de construcciones tradicionales nos núcleos rurales d'Asturies va prohibise sacantes escepciones, al empar que va defendese la construcción nos pueblos asturianos de cases acordies a tipoloxíes tradicionales, según diz la propuesta de nueves directrices d'Ordenación del Territoriu aprobada pol Gobiernu asturianu y que tien de sustituyir a les normes vixentes que son del 1991.

El diariu uvieín "La Nueva España" adelantaba ayeri estes primeres llinies d'unes ordenances coles que'l Gobiernu asturianu quier apautar unes normes de crecimientu y d'edificación que respeten tolo posible'l paisaxe tradicional, y les normes van espeyar aspectos tan concretos como los llugares au pue emplegase teya o pizarra o la clase de muria cola que puen zarrase los praos, amás de prohibir l'emplegu de tipoloxíes de construcción urbanes nes zones rurales. No tocante al crecimientu de los pueblos apáutase que los núcleos de población van tener un tope pa la construcción de viviendes nueves pol que los pueblos nunca van poder crecer más del doble.

Les primeres anuncies sobre lo que van ser estes nueves ordenances lleguen en medio d'un gran debate sobre l'apertón urbanísticu que sufre la costa asturiana. Nesti sentíu, el grupu "Coordinadora Ecoloxista d'Asturies" denunció ayeri un plan urbanísticu pa Cuideiru encabezáu pola promotora gallega Anjoca que calificó de fenómenu "marbellización". El plan pa la villa pixueta supondría la urbanización d'una superficie de más de 300.000 metros cuadraos na marxe izquierda de la carretera que va pa contra Cuideiru y d'otros 122.000 de la mandrecha nuna zona que ye "paisaxe protexíu de la costa occidental". Los ecoloxistes afirmen que pa llevar alantre la urbanización, el Conceyu de Cuideiru y la promotora van facer una permuta de propiedaes pol qu'esta va entregá-y al conceyu terrén non urbanizable que tien dientro de la faza d'esclusión qu'acuta'l Plan d'Ordenación del Litoral Asturianu (POLA) y que resguarda los 500 primeros metros dende la llinia de costa de cualquier edificación.

La organización ecoloxista afirma que'l proyectu, pol que se fadríen más de 1600 viviendes, delles en bloques de cuatro pisos y pa nada respetuoses con tipoloxíes tradicionales, yá se da por fechu por parte de la empresa incluso con tener que pasar entovía por bien de peñeres llegales, ente elles la de la CUOTA, y ello ye que la promotora hasta lu anuncia fuera d'Asturies, como probaría un cartafueyu que la empresa repartió nuna feria inmobiliaria en Madrid anunciando les viviendes de Cuideiru.

D'otra manera, el debate sobre la edificación nel suelu rural llevanta tamién la rocea de los vecinos de la Rasa de Seloriu y de Lluces, ente Villaviciosa y Colunga, onde'l grupu Masaveu tien previsto construyir una urbanización de más de 300 viviendes y un campu de golf sobre una superficie de cerca de dos millones de metros cuadraos de los que bien d'ellos son de titularidá comunal.

Les ordenances que quier llevar alantre'l Gobiernu asturianu van llegar tarde pa munches construcciones tradicionales, ente elles les de Truyés, en Corvera, onde la constructora que lleva alantre la urbanización "Los Balagares" consiguió valtar les cases tradicionales de la parroquia y los horros y paneres nun procesu denunciáu por asociaciones de vecinos del llugar.