Les declaraciones de Feito sobre la oficialidá son consideraes pola XDLA como burlles al asturianu

|
Javier Fernández y Belarmino Feito presentación telescopiu

Autoodiu, sentimientu d'inferioridá llingüística o clasismu nel usu social de les llingües son dalgunes de los calificativos qu’emplega la Xunta pola Defensa de la Llingua Asturiana (XDLA) pa describir les pallabres de Belarmino Feito, presidente de FADE, sobre la oficialidá. El coleutivu considera que son burlles “llamentables”.

Les declaraciones de Belarmino Feito, presidente de la Federación Asturiana de Empresarios (FADE), qu'aprovechó la presentación d'un telescopiu fabricáu na so empresa, Asturfeito, pa burllase del asturianu y avisar a los partíos políticos de les consecuencies presupuestaries de la oficialidá, resumen en mui poques palabres tol repertoriu de prexuicios contra les llingües minorizaes”, apunten dende la XDLA, organización que recuerda que la postura de la cabeza visible de la patronal asturiana recuerda a la de los “sensatos y pensantes” de la década de los 80 que “avisaben a los responsables políticos del peligru de que la recuperación del asturianu tuviere éxitu. Aquel movimientu intolerante de sectores minoritarios, pero influyentes pol so estatus económicu, profesional y social, buscaba negar les aspiraciones democrátiques de los falantes de la llingua del pueblu, esa llingua que falaben los que-yos llimpiaben les cases o trabayaben nes sos fábriques”.

Esti clixé, considera, torna agora “cuando les llibertaes ciudadanes s'enanchen y la petición d'oficialidá reclama reconocer derechos y poner los medios pa que'l patrimoniu llingüísticu d'Asturies pueda sobrevivir”. “Les fuercies vives avisando de los peligros del apocalipsis y echando mano d'un tópicu que se pue resumir en ‘nin un duru pal bable mentes haya fame nel mundu’. Evidentemente, ye un argumentu que se pue aplicar a cualquier gastu del presupuestu autonómicu (incluyíes les partíes marafundiaes pa cursos de la FADE), pero, casualmente, namás se saca cuando se trata de falar de presupuestos pa la recuperación del asturianu”, critica esti coleutivu.

Estes declaraciones causen más tristura al venir “d’una persona que se diz arguyosa de les sos raíces somedanes. Nun nos estraña. Esi ye otru tópicu del autoodiu: soi de pueblu, pero ríome de lo que fala la mio xente”. Sicasí, la XDLA felicítase de “qu’esa clas d'actitúes yá nun son les que predominen na sociedá asturiana. Tán tovía mui enraigonaes en dellos sectores influyentes, sí, pero les coses van cambiando. Los prexuicios, el clasismu, el sentimientu d'inferioridá..,. son actitúes que van desapaeciendo cola formación y la educación. L'Asturies arguyosa del so patrimoniu que se manifestó estes últimes selmanes reclamando derechos y futuru ye'l meyor exemplu d'esa sociedá abierta y democrática que quier reconocer derechos y non negalos”.

Na imaxe, Feito acompaña al presidente d'Asturies, Javier Fernández, mientres un operariu da-y indicaciones. Semeya obra d'Armando Álvarez.

Contador Estadistiques