Les ayudes a la producción editorial n’asturianu aumenten en 8.500 euros

Ye la única de les trés llinies de subvención que ve medrar la cantidá presupuestada. La de medios menguó un 37 por cientu y la discográfica, un 16,7 por cientu, siendo la suma total un 18,29 por cientu menor que nel 2014.

Espublizada nel BOPA dos meses y mediu más tarde que con respeuto al 2014, esta convocatoria ufre en concreto 8.470 euros más, al pasar de 81.513,4 a 90.000 euros, lo que supón una medra del 10,41 por cientu. Pese a esti aumentu, l’ayuda ye entovía menor que nel 2013, cuando foi de 100.000 euros.

En comparanza con 2014, les subvenciones al asturianu y gallego-asturiano menguaron un 18,29 por cientu al pasar de 232.513,4 euros a 190.000. Esta reducción ye entovía más esmoleciente si miramos los datos del 2013, cuando’l Gobiernu presupuestó 308.000 euros: un 38,32 por cientu.