Cultura reduz les subvenciones a medios de comunicación n’asturianu nun 37 por cientu

Les ayudes a empreses informatives pa la normalización del idioma pasen de 127.000 euros a 80.000. No que respeuta a la producción discográfica n’asturianu, el descensu ye del 16,7 por cientu.

Siguiendo la dinámica de los años últimos, la Conseyería d’Educación, Cultura y Deporte mete la tisoria nes ayudes al asturianu. Pendiente todavía de conocer les correspondientes a la producción editorial, que saldrán en díes próximos nel BOPA, tanto les subvenciones a medios de comunicación como a la producción discográfica descendió de manera significativa.

No que respeuta a empreses informatives, la cantidá presupuestada ye de 80.000 euros, 47.000 menos que l’añu pasáu, lo que supón una mengua del 37 por cientu. La reducción nes ayudes ye entá más significativa si comparamos los datos d’esti añu colos del 2013, cuando Cultura dedicó 168.000 euros a esti apartáu, esto ye, 88.000 euros más. Poro, el recorte n’ayudes a medios de comunición foi en dos años del 52,98 por cientu.

Tamién la metá de perres qu’hai dos años

La cantidá total d’ayudes pa la producción discográfica n’asturianu y gallego-asturianu ye de 20.000 euros polos 24.000 del añu anterior, lo que supón 4.000 euros menos, una mengua del 16,7 por cientu. Hai dos años, l’importe dedicáu a esti apartáu foi del doble qu’agora, 40.000 euros.