Les 300 places pal esame intermediu B2 d’asturianu quedaron curties

Per segundu añu siguíu una bona cantidá de persones quedó fuera de la prueba de certificación de Llingua Asturiana adaptada al Marcu Común Européu de Referencia pa les Llingües de nivel B2. Les 300 places convocaes esti cursu, 200 menos que’l pasáu, enllenáronse dada la demanda alta, que foi menor nel avanzáu C1, el de mayor esixencia, anque tamién con una cifra importante de matriculaciones.

A la espera de la confirmación de la cantidá esauta de solicitúes de matrícula, ésta superaría ampliamente les 400 pal intermediu B2. Na convocatoria anterior, la primera que s’entamaba, foron cuasi 800 los aspirantes, quedando fuera trés centenares al ser el tope de places de 500.

Nesta ocasión la cifra rebaxóse a 300, anque se convocó una segunda prueba, la del nivel más altu, el C1, con otres 300. Nesti casu nun se llegaron a cubrir, dada la so esixencia y la intención de munchos esaminantes de tener un primer contautu nesti tipu d'esámenes d'idiomes col B2, que tuvo un 62 por cientu d’aprobaos l’añu pasáu, anque les cifres de matriculación nesti casu tamién son importantes.

El sortéu entamáu’l 22 de mayu pa tolos procesos docentes del cursu presente dio preferencia a les persones con apellíu qu’entame por ‘DS’ nel sentíu del alfabetu. Los interesaos en consultar si tienen plaza han facelo al traviés d’Educastur, introduciendo l’identificador que recibieron nel so dispositivu móvil, cola posibilidá de presentar alegaciones dende mañana y hasta’l vienres.

La llista definitiva va tar disponible’l martes viniente, abriéndose darréu’l plazu de pagu, del 5 al 18 de mayu. Les dos pruebes van celebrase nel mes d’ochobre, cola prueba escrita’l 9 y les orales dende’l 18.