630 persones apuntáronse pa les pruebes de certificación d'asturianu, que van ser reconocíes por Educación

Un total de 131 persones quedaron fuera esti añu de les pruebes de certificación de Llingua Asturiana adaptaes al Marcu Común Européu de Referencia pa les Llingües de nivel B2, con un tope de 300, mentes qu’otros 199 matriculáronse pal C2, títulos que finalmente van ser reconocíos por Educación nel rexistru personal de formación permanente. El martes fina’l plazu de pagu de tases.

El preciu del esame son 31,63 euros, con descuentos esistentes pa integrantes de families numberoses o exención de pagu en dellos casos. Si na convocatoria anterior hebo cuasi 800 solicitúes pal nivel intermediu B2 d’asturianu pa 500 places, nesta apuntáronse 431 pa 300, mentes que pal avanzáu C1, que se celebra per primer vegada hebo 199 solicitúes, un total de 630 ente los dos.

Quedaron fuera por sortéu de lletra del primer apellíu, poro, 131 persones, en dalgunos casos per segundu añu, qu’habrán d’esperar pal cursu viviniente pa certificar el so nivel d’asturianu. Un títulu que por fin va tener el reconocimientu de d’Educación nel casu d’aquellos docentes que superen la prueba y lo incluyan nel so rexistru personal de formación permanente.

“La conseyería analizó la modificación de la normativa que regula la formación permanente del profesoráu que s’ha facer pa dar respuesta al reconocimientu de creitos de formación coles certificaciones del nivel competencial de llingua asturiana. D’esti mou, van ser oxetu de reconocimientu toles certificaciones, tanto les yá emitíes l’añu pasáu como los que saldrán de las convocatories d’esti año 2021 y les posteriores, tanto n’asturianu como en gallego-asturiano”, confirmaron dende Educación.

La razón pola que, argumenten, nun se fixera enantes ye que’l Decretu 62/2001, de 28 de xunu, pol que se regulen les actuaciones relativas a formación permanente del profesoráu y la convocatoria, reconocimientu, certificación y rexistru de les actividaes correspondientes, “nun recueye como formación les pruebes de certificación n’asturianu porque nesi momentu –nel añy 2001– nun taben previstes”. Foi’l Sindicatu Unitariu Autónomu de Trabayadores de la Enseñanza d’Asturies (SUATEA) el que denunciara esta situación.

Berta Piñán, conseyera de Cultura, Política Llingüística y Turismu, confirmara recién tamién la validez d’esti certificáu de conocimientu del idioma, que se van tener en cuenta “nes diferentes ufiertes de trabayu a la función pública o tamién campañes de normalización que queremos facer pa entidaes privaes de cierta relevancia, que les tengan como aval”. Les pruebes esti cursu van tener llugar n'ochobre, cola escrita’l 9 y les orales dende’l 18.