Laura Menéndez Fernández y Javier Bengoechea lleven el primer ‘Indumentaria’

Esti domingu celebróse en Grau'l Día’l Traxe’l País, al qu’acudieron más de doscientes persones vistíes col so paxellu tradicional. 40 d’ellos participaron nel concursu ‘Indumentaria’, que ganó Laura Menéndez Fernández y Javier Bengoechea.

Constantino Menéndez, Consuelu Ríu, Fe Santoveña y Ana Villanueva encargáronse a primer hora d’evaluar a les homes y muyeres que s’apuntaron a ‘Indumentaria’. Foi na capiella los Dolores, momentu nel que los participantes tamién vivieron una sesión fotográfica a cargu del estudiu Ojos de Hojalata.

Darréu, un numberosu públicu desplazáu a Grau pa disfrutar del Día’l Traxe’l País, a los que se sumaron los munchos visitantes del mercáu dominical de la villa moscona, pudieron disfrutar de la guapura de los paxellos nuna pasarela instalada na Plaza los Dolores. Tres el desfile diéronse a conocer a los ganadores nes dos categoríes: traxe de muyer, que foi pa Laura Menéndez Fernández, y d’home, pa Javier Bengoechea. Dambos llevaron 200 euros y una lliga de llana esclusiva.

El segundu puestu, mentes, mereciólu Marina Caso del Torno y Miguel Ángel Alonso Guerra, y el terceru Maribel Fernández González y Jonathan Martínez Fuente. La so recompensa foi de 150 y 100 euros, de manera respeutiva, premios patrocinaos pola Caja Rural d’Asturies.

Va tener continuidá

Tanto’l concursu como la xornada festiva en xeneral tuvieron animaos con música y baille gracies a la pareya de gaita y tambor que formen Arsenio González y Manolo Díaz, el violinista Dolfu Fernández y l’acordión d’Octavio Trapiello. Amás, collaboraron con delles pieces Xosé Antón Fernández ‘Ambás’ y Ramsés Ilesies.

El bon ambiente vivíu y la respuesta de públicu y ciudadanos vistíos col paxellu tradicional llevó a la conseyera de Festeyos, Elsa Suárez, a confirmar que l’añu qu’entra va repetise esta esperiencia ideada pola empresa de xestión cultural, comunicación y diseñu gráficu B. Alto. Inclusive apuntó’l so deséu de que’l Día’l Traxe’l País s'asentara dientro del calendariu festivu del conceyu.

Na imaxe, d'izquierda  a derecha, Martínez Fuente y Fernández González, terceros clasificaos; Bengoechea y Menéndez Fernández, ganadores; y Caso del Torno y Alonso, segundos. Semeya fecha por Ojos de Hojalata.