‘Indumentaria’ va enllenar Grau de persones vistíes col traxe’l país

Tres l’ésitu de la primer edición, el 'Día del Traxe'l País' torna esti domingu a Grau con un programa más ampliu entovía y una previsión d’asistencia de 200 persones col traxe’l país. Al concursu 'Indumentaria', programáu pela mañana, va xunise de tarde un gran baille.

Les persones inscrites a competición asciende nesta ocasión a 35, certame que va dar comienzu a les 11 hores na plaza los Dolores con un pase pal xuráu, formáu por Amadéu Benavente, Constantino Menéndez, Consuelu Riu y Ana Villanueva. A les 12.30 hores van facer lo propio pal públicu, pa depués dar les distinciones a los ganadores y celebrar una gran danza prima na plaza La Panerina.

Nesta ocasión, van participar traxes representativos de tolos estamentos sociales de la segunda metá del sieglu XIX, polo que se van poder ver traxes de pastor y de noble, y d’aldeanos pobres y pudientes. Los primeros premios tán dotaos con 200 euros y una lliga de llana esclusiva; los segundos, con 150 euros, y los terceros, con 100 euros.

El concursu va tar animáu con música interpretada en direuto. Asina, van tocar la pareya de gaita y tambor que formen Arsenio González y Manolo Díaz, el violinista Dolfu Fernández y l’acordinista Octavio Trapiello. Amás, van intervenir con dalgunes pieces Xosé Antón Fernández ‘Ambás’ y Ramsés Ilesies.

Nesti día van tener tamién actividaes pensaes para los más pequeños. Los neños y les neñes van tener, d'once a una, delantre del conceyu xuegos y un taller de baille tradicional impartíu pol Conceyu de Cultura Tradicional Vezos Astures.​

La tarde, pa baillar

El Día’l traxe’l país» crez nesta segunda edición y va tener pela tarde, a partir de les cinco, un gran baille asturianu a lo suelto y a lo agarrao. Nun escenariu instaláu na Plaza’l Mercáu, un elencu de músicos tradicionales de primer nivel van tocar y van cantar hasta l'atapecida. El baille va arrincar con cantar y sones a les panderetes interpretaos por Xosé Antón Fernández 'Ambás' y Ramsés Ilesies. A estos maestros de la música tradicional van siguilos con más toques de panderetes por Leticia González (Grau), María del Carmen Santos (Mieres), Mónica Menéndez y Lucía Carrizo (Castrillón), y Rosa Caballero y Zaida Antomil (Cangas). Va continuar el baille con dos pareyes de gaita y tambor: Pedro Pangua y Flavio R. Benito, y Santi Galguera y Manolín El de Parres. Pa rematar el día xotes, muñeires, valses y mazurques al cargu de La Bonturné, cuartetu formáu Santi Caleya (gaita y clarinete), Merce Santos (zanfonía), David Varela (acordión) y David Casillas (contrabaxu).

Eventos únicos n'Asturies

'Indumentaria' y el 'Día’l traxe’l país' son una iniciativa de la empresa de xestión cultural, comunicación y diseñu gráficu B. Alto, en collaboración cola Conceyalía de Festexos del Conceyu de Grau y la Caxa Rural d'Asturies.

Estos dos eventos únicos nel calendariu festivo y cultural d'Asturies son una fiesta para tol mundu, concursante o non, y espérase, como na edición anterior, la participación expontánea de la xente cantando y baillando pel centru de la villa a lo llargo de tola mañana. Amás, estos actos son una oportunidá por que toes les persones que tengan un traxe tradicional asturianu puedan vistilo pol gustu de faelo, reivindicando esti patrimoniu cultural munches vegaes escaecíu nes colecciones museográfiques asturianes que s'ocupen de temes etnográficos y antropolóxicos.

Na semeya: Elsa Suárez y Plácido Rodríguez (Conceyales de Festexos y Cultura del Conceyu de Grau), colos traxes que van incorporase a los fondos del Muséu Etnográficu de Grau. Semeya: Ojos de Hojalata.