L'aumentu d'osos abre un alderique ente ganaderos y conservacionistes

|

Asturias Ganadera pide a la conseyería midíes pol aumentu de la presencia del plantígradu en delles zones del país y la Fundación Oso Pardo fala de "alarmismu innecesariu".

Nuna rueda de prensa celebrada'l llunes, esti coleutivu de ganaderos quexábase de la falta d'intervención de la Conseyería de Desarrollu Rural y Recursos Autóctonos énte l'aumentu del númberu d'osos, con un averamientu cada vez mayor del animal a llugares habitaos y ataques al ganáu. Asina, demandaron que se paguen los daños que provoca l'animal –munches vegaes atribúinse a llobos, yá que polos daños d'osu págase un 10 por cientu más–, que se ponga en marcha un 'teléfonu osu' p'avisar de la presencia d'estos plantígrados o la identificación xenética d'exemplares, en otros asuntos, pa evitar, nes sos pallabres, que se repitan situaciones como les del llobu o'l xabaril

Según les cifres aportaes por Asturias Ganadera, n'Asturies hai 240 exemplares, considerando que podríen llegar a los 900 nuna década. Inclusive, esti coleutivu llegó a afirmar que yera un engañu que l'osu pardu tuviera en peligru en desaniciu, una sentencia que rectificó al día siguiente.

Ablucamientu

Énte esti posicionamientu de los ganaderos, la Fundación Oso Pardo afirmó tar ablucada "por una socesión encadenada de mensaxes alarmistes y infundaos sobre'l peligru que suponen los nuesos osos pal ganáu y les persones que viven nos campos asturianos". Asina, esti coleutivu reconoz que "los osos cantábricos tán recuperando, pero entovía cumplen los criterios internacionales qu'obliguen a consideralos como una población en peligru de desaniciu", añadiendo que les cifres de población daes por Asturias Ganadera carecen "de base científica y tresmite un mensaxe que nun ye real".

"Los poquísimos incidentes ente osos y persones que se rexistraron nel cuartu de sieglo últimu muestren que'l riesgu que supón la nuesa población d'osos pa les persones ye mui reducíu", inciden los conservacionistes, que, sicasí, reconocen que "anguaño hai más probabilidá de conflictu al rodiu los pueblos, que cada vegada tán más vacíos, oonde los osos s'averen, por exemplu, a comer frutos". Estos retos nuevos a los que s'enfrenta la sociedá necesiten, na so opinión, "una xestión dinámica que s'adapte a cada situación. Esto inclúi poner yá en marcha'l protocolu d'actuación énte osos conflictivos o con problemes que llevamos munchu tiempo pidiendo a la Alministración, y que parez que ta a piques d'aprobase".
 
"La convivencia pacífica ente osos y la ganadería sólo pue garantizase si s'afiten y caltienes calces de collaboración entre l'Alministración y el sector ganaderu, y s'actúa por dambes partes con moderación y responsabilidá", fina la Fundación Oso Pardo, que recuerda l'esistencia de la patrulla osu n'Asturies dende hai venti años pa resolver conflictos y demanda axilidá a la conseyería pa "una valoración oxetiva y un pagu xustu de los daños del osu".
 
Esta selmana plantegamos en 'Conceyu Abiertu' una entruga al respeutive d'esta cuestión. ¡Participa calcando equí!

Comentarios

Lo mesmu que fecio el franquismu cola nuestra llingua tan faciéndolo éstos cola nuestra ganadería, amás, sofitáu por dellos asturianos urbanites allonxaos la cultura asturiana por mor la globalización. Qué ta pasando colos asturianos??? Nun somos toos fiyos y ñetos de los pueblos, fiyos y ñetos del ganáu. Cultura celta ganadera con races llariegues en desañiciu, dexando morrir la nuestra ganadería sofitando una ganadería intensiva al mou americanu.

Contador Estadistiques