L'Audiencia estima'l recursu del OCAN sobre'l sobrecostu d'El Musel

L'Observatoriu Ciudadanu Anticorrupción (OCAN) felicítase pol auto de l'Audiencia Nacional que va permitir siguir col procesu entamáu pa esixir responsabilidaes pol sobrecostu d'El Musel. Afirma que "ratifica l'esfalcu que supón pa la economía estatal".

"Ye evidente qu'unos sobrecostos de 250 millones de euros nun son economía doméstica", apunten dende OCAN, que compara esta cantidá coles perres defraudaes pola trama Gürtel, estimaos nunos 120 millones d'euros. "La ampliación d'El Musel supunxo 800 millones, de los que 250 millones marcharon en sobrecostos de duldosa llegalidá. Paez claro que la complexidá del casu y la envergadura económica de la presunta corrupción esixe la mayor y meyor atención xudicial", afirmen.

Esti coleutivu recuerda que, según la OLAF, el casu d'El Musel representa la cuarta parte del fraude comunitario nel 2014. "Esto ye, de tolos casos de fraude con fondos europeos mientres l'añu 2014, El Musel por sí solo ya supunxo el 25 por cientu del montante económicu total", polo que pa OCAN, "y también pa l'Audiencia Nacional", la repercusión na economía estatal "será mui grande nel casu de qu'haya que devolver la subvención concedida a esta inversión".

D'igual forma, l'Observatoriu considera que "cuanto enantes se resuelva esti asuntu y se depuren responsabilidaes, habrá una mayor percepción na ciudadanía sobre la importancia y la pertinencia de lluchar contra la corrupción".