La xueza del ‘casu Musel’ propón l’apertura d’un xuiciu oral al detectar fraude y prevaricación

|
El Musel

El ‘casu Musel’, qu’investiga los sobrecostos de 250 millones d’euros nes obres d’ampliación del puertu xixonés, ta más cerca de l’apertura de xuiciu oral. La xueza de l’Audiencia Carmen Lamela asume l’escritu de Fiscalía al deteutar un posible fraude y prevaricación nes actuaciones de los 24 investigaos.

D’esta forma, la maxistrada refuga los argumentos de la defensa y señala a altos funcionarios y direutivos d’empreses que participaron na planificación y execución de les obres d’ampliación d’El Musel. Ente ellos destaquen Fernando Menéndez Rexach, ex presidente de l’Autoridá Portuaria; el so ex direutor, José Luis Díaz Rato; Fernando Palao, ex secretariu d’Estáu; Mariano Navas, ex presidente de Puertos del Estáu; o José María Alcoba, ex abogáu del Estáu.

L’actuación de toos ellos presenten indicios de criminalidá, según apunta Lamela n’autu na que rellata toles irregularidaes atopaes. El comienzu d’esta investigación tuvo’l so orixe nes denuncies presentaes por Andecha Astur énte la Oficina Europea de Lucha contra’l Fraude (OLAF) de la Comisión Europea y por Los Verdes d’Asturies n'Europa tres deteutar una axudicación non conforme a la llei de los trabayos a la Xunión Temporal d’Empreses (XTE) Dique Torres.

La de la formación nacionalista llevó a l'apertura d'una investigación de la OLAF que finó nun informe nel que se reclamaben los 198 millones d’euros de les ayudes europees concedíes y yá recibíes, y se refugaba la entrega d’otros 49.500.000 euros reteníos por mor de l’apertura d’esta investigación. L'Observatoriu Ciudadanu Anticorrupción (OCAN) presentó tamién presentó una denuncia polos sobrecostos de la obra portuaria.

Semeya obra de Bafpg [CC BY-SA 4.0 (https://creativecommons.org/licenses/by-sa/4.0)].

 

Contador Estadistiques