L’asturianu, otru añu ensin presencia nos Premios Princesa de Asturias

|
José Víctor Rodríguez Fernández en Mual na entrega del Premiu al Pueblu Exemplar d'Asturies

Unos versos de Naciu'i Riguilón en Mual en boca del alcalde de Cangas, el socialista José Víctor Rodríguez, foi la única presencia del asturianu nos actos de los Premios Princesa de Asturias. L’ALLA tien solicitao a la Fundación l’emplegu del idioma por parte de Felipe VI en dalgún de los actos públicos entamaos polos gallardones.

El respetu de la toponimia oficial y la espublización de les bases del Premiu al Pueblu Exemplar d’Asturies n’asturianu y gallego-asturiano son los xestos que dende la Fundación Princesa de Asturias vienen faciendo nos años últimos a les dos llingües propies del país. Nes actividaes programaes na selmana de los premios y na ceremonia d’entrega del Teatru Campoamor la so presencia ye inesistente.

Esti añu namái s’emplegó l’asturianu na visita de los reis d’España a Mual pa la entrega del Premiu al Pueblu Exemplar d’Asturies. Foi per aciu l’alcalde Rodríguez, que finó’l so discursu con unos versos de Naciu’i Riguilón, escritor natural d’esta población del conceyu de Cangas del Narcea: ‘Pueblu sou, / Pueblu me chamu. / Siendo Pueblu / hei de morrer. / Como nun diba ser / Pueblu / si un Pueblu foi nacer.

Felipe VI nun utiliza l’asturianu a pesar de los pidimientos fechos al respeuto dende va tiempu pola Academia de la Llingua Asturiana. “Emplegando l’asturianu nun actu públicu de los munchos nos que participa esos díes polos premios, el rei amosaría’l so respetu y consideración cola cultura asturiana y col pueblu asturianu”, señala’l presidente Xosé Antón González Riaño.

Na semeya, Rodríguez, detrás del micrófonu, aplaude mientres l'actu d'entrega del Premiu al Pueblu Exemplar d'Asturies. Semeya obra d'Armando Álvarez.

Contador Estadistiques