L'asistencia lleonesa marcó l'homenaxe d'Andecha Astur al Conseyu Soberanu

|
Actu d'homenaxe Conseyu Soberanu Andecha Astur

L'actu celebráu en Tarna contó con dellos ciudadanos del país vecín desplazaos a Asturies pa recordar l'ochentenu aniversariu de la declaración de soberanía.

Un grupu de militantes y simpatizantes d'Andecha Astur aconceyó un añu más na mañana d'ayeri frente al monumentu llevantáu en Tarna que fai alcordanza de la decisión del Conseyu Interprovincial d'Asturies y Lleón de declarar la soberanía nel territoriu qu'alministraba, naciendo asina'l 24 d'agostu del 1937 el Conseyu Soberanu d'Asturies y Lleón. Na intervención política celebrada nel llugar reivindicóse esta institución "como la única que representa Asturies, darréu que l'estatutu d'autonomía que carecemos, y la propia denominación de 'Principado' pa la nuesa nación, foi impuesta dende Madrid, ensin que los asturianos, a diferencia d'andaluces, gallegos, vascos, catalanes..., pudiéremos pronunciamos democráticamente sobre la mesma", y denunciando como la falsa "la transición política cola que continuó’l franquismu que non solo nun permitió recuperar esta auténtica institución d'autogobiernu, sinón qu'impuxo un 'Principado' y un Estatutu descontestualizáu hestóricamente y sociolóxicamente ayenu a la sociedá asturiana, que nun supón más qu'una curtia descentralización alministrativa, condergándomos asina a la situación de colonialismu que carecemos anguañu", recuerda la organización nacionalista nun comunicáu.

Tamién hebo crítiques al papel de la izquierda española n'Asturies, "qu'asumió y asume l’agresión a la dignidá y la soberanía asturiana que supón el 'Principado' impuestu". Por último, Andecha Astur reclamó’l Conseyu Soberanu como la última institución democrática del pueblu asturianu, y la soberanía como un derechu "irrenunciable imprescindible p’afitar el nuesu futuru como pueblu".

Nesta ocasión destacó la presencia de ciudadanos lleoneses que, coles sos banderes, sumáronse al homenaxe nun ambiente de xermandá. Los participantes desplazaos dende Lleón, aprovechando'l cumplimientu de la Llei de Memoria Histórica na capital, propunxeron que l'avenida Fernández Ladreda cambie de nome pa pasar a ser l'avenida del Conseyu Soberanu.

Contador Estadistiques