Andecha Astur xube a L'Abidular n'homenaxe al Conseyu Soberanu

Tamién va facer una concentración frente al monumentu que lu recuerda en Tarna.

Como ye vezu, Andecha Astur celebra un actu d'homenaxe al Conseyu Soberanu d'Asturies y Lleón coincidiendo cola cercanía al 24 d'agostu, fecha na que se firmó en Xixón el decretu qu’afitaba la soberanía de los territorios alministraos pol Conseyu Interprovincial d'Asturies y Lleón. Asina, el sábadu, 25 d'agostu, 81 años depués del día en qu'entraba en vigor dichu decretu, militantes y simpatizantes de la organización nacionalista desplazaránse a Tarna pa recordar a esta institución.

Nesta ocasión l'actu va contar con dos partes. En primer llugar, a les 11 hores, procederáse a xubir a les trincheres de L'Abidular dende onde l'exércitu del Conseyu Soberanu defendió'l país frente a les tropes franquistes.

Darréu, a les 13.30 hores, va tener llugar l'habitual concentración delantre’l monumentu que fai alcordanza d’esta histórica declaración, "aniciu d'una auténtica República Asturiana". "Esta proclamación soberanista que permitió qu’Asturies entamare un auténticu procesu revolucionariu y se defendiera heróicamente del exércitu facista español/italianu/alemán, enxamás nun cuntó cola aprebación de la República Española, que llegó a considerar un alliviu l’ocupación d’Asturies poles tropes facistes", recuerden dende Andecha Astur al tiempu que reclamen al "Conseyu Soberanu como la última institución democrática del pueblu asturianu, y la soberanía como un drechu inrenunciable imprescindible p’afitar el nuesu futuru como pueblu, perafitándose na reivindicación de la República Asturiana".