L’arte pictóricu asturianu protagoniza’l calendariu de LaKadarma del 2021

El calendariu de la Banda Gaites LaKadarma va camín de convertise nun clásicu d’estes feches, si nun lo ye yá. Un añu más esta formación sorpréndenos con otru trabayu enllenu de creatividá, ‘La MazKarada’, centrándose nesta ocasión en dar visibilidá al arte pictóricu del país cola recreación de cuadros de pintores asturianos.

Si nel 2019 propunxo una reflexón sobre los roles de xéneru y nel 2020 quixo amosar la decandencia d’Asturies con una invitación a combatila, pa esti 2021 LaKadarma apuesta por dar a conocer el nuesu patrimoniu centrándose na pintura. La fórmula ye la mesma: cada mes va acompañáu d’una semeya na que participen integrantes de la banda de gaites.

En total son 13 fotografíes nes que se representen obres de Marixa, Julia Alcayde, Mariano Moré, Carolina del Castillo o Evaristo Valle, ente otros, trayendo al asturianu los sos títulos. Una bona manera d'amosar la obra d’estos artistes, animando a comparar la recreación col cuadru orixinal.

‘La MazKarada’ tien un preciu de 7 euros na venta direuta y de 10, más gastos d'unviu, nes modalidaes en llinia. Tán disponibles na web de LaKadarma, na plataforma Musicasturiana o contautando colos propios músicos.

Na semeya, superior, recreación de 'Leyendo' de Carolina del Castillo. Enriba d'estes llinies, l'orixinal.