El calendariu de LaKadarma del 2020 amuesa la decadencia actual d'Asturies y convida a combatila

|
Calendariu 'DeKadencia' de LaKadarma 2020 Carmín

La Banda Gaites LaKadarma dedica’l so calendariu d’esti añu a amosar, al traviés de la fotografía y de testos, cómo ve la situación actual d’Asturies. Baxo’l significativu nome de ‘DeKadencia’, la formación nacida en Nava y asentada en Piloña, escueye llugares carauterísticos del tol país pa llevar a la reflexón al observador.

Mes a mes el calendariu fai rescamplar ún per ún los aspeutos principales de la decadencia d'una Asturies "que paez empobinada al abismu de la inmovilidá y la irrelevancia". Una vía de tren, el Calatrava, un horru abandonáu, el vieyu Maternu Infantil d'Uviéu o la porquería dexada nel prau del Carmín de La Pola Siero son dalgunos de los símbolos escoyíos por LaKadarma p'amosar "les ruines del patrimoniu, la decadencia social y demográfica, el desaniciu de los servicios públicos, la crisis económica o la corrupción política".

Con esta propuesta, con diseñu y fotografíes de Leti Cernuda, la intención de la banda de gaites nun ye tratar d’amosar “un tonu pesimista, sinón xenerar reflexón y mover a l'aición a toes aquelles persones que lu contemplen”. Disponible pa mercar en dellos puntos de venta, como La Traviesa (L’Infiestu), La Naveta (Nava), L’Esperteyu (Uviéu), CSA La Semiente (L’Entregu), La Revoltosa (Xixón), El Cafetón (Avilés) o La Semeya (Noreña), amás d’en llinia na páxina de Música Asturiana, esti sábadu va presentase n’El Remediu, nel CSA L’Apiaderu, a les 19 hores, a lo que va siguir un conciertu de Dr. Balkan.

Semeya obra de Leti Cernuda.

 

Contador Estadistiques