L’apoyu únicu del PRC obliga a Sánchez a dir a una segunda votación cola investidura nel aire

|
Pedro Sánchez primer votación investidura

El socialista Pedro Sánchez nun algamó la mayoría absoluta na primer votación del Plenu d’Investidura nel Congresu y va tener qu’acudir a la segunda, convocada pal xueves. Namái tuvo 124 votos a favor –los del so grupu y el PRC–, lloñe de los 176 necesarios, con 170 en contra y 52 astenciones, ente elles les de Xuníes Podemos.

El candidatu a presidente del Gobiernu estatal nun llogró convencer a los sos posibles aliaos nel alderique y sólo confirmó l’apoyu que yá sabía, el del diputáu del Partido Regionalista de Cantabria (PRC). Xuníes Podemos, que tenía previsto votar en contra de Sánchez, como amuesa’l votu telemáticu en contra de la diputada Irene Montero, n’estáu adelantáu de xestación, finalmente astúvose, mesma posición que tuvieron EAJ-PNV, EH Bildu y Compromís.

El restu de fuercies votaron en contra del presidente en funciones, que deberá de negociar apoyos nestes 48 hores. El posible pautu ente PSOE y Xuníes Podemos pa formar un gobiernu de coalición condicionarán les posiciones de dellos partíos pa la segunda votación, convocada pal xueves a partir de les 14.25 hores –la sesión va comenzar a les 13.30 hores–, onde Sánchez necesita una mayoría simple pa ser investíu presidente y evitar, asina, unes eleiciones nueves.

Contador Estadistiques