La falta d’alcuerdu ente PSOE y Xuníes Podemos impide la investidura de Sánchez y avera unes eleiciones nueves

|
Pedro Sánchez segunda votación investidura

La propuesta de Pablo Iglesias al PSOE dende la tribuna d’arrenunciar al Ministeriu de Trabayu a cambiu de competencies pa dirixir les polítiques actives d’emplegu refugóla Adriana Lastra y Xuníes Podemos astúvose na segunda votación de la fracasada investidura de Pedro Sánchez. Habrá eleiciones nueves nel casu de nun haber un cambiu de postures enantes del 23 de setiembre.

Sánchez algamó los mesmos apoyos que’l martes, 124, los del so grupu y el del Partido Regionalista de Cantabria (PRC), mentes que sumó 67 astenciones, les de Xuníes Podemos, EAJ-PNV, EH Bildu y Compromís, a los que se sumó nesta ocasión ERC. El restu de la Cámara, 155 diputaos, posicionáronse en contra.

Al perder la investidura, el presidente del Gobiernu en funciones tien agora dos meses pa sumar apoyos, en concreto hasta’l 23 de setiembre. Nel casu de nun algamalos, el rei d’España disolvería les Cortes al día siguiente y convocaría eleiciones nueves pal 10 de payares.

Esti escenariu paez agora’l más factible, daes les diferencies amosaes ente’l PSOE y Xuníes Podemos mientres el Plenu d’Investidura. Tres la primer votación, na que Sánchez necesitaba mayoría absoluta (124 a favor, 170 en contra y 52 astenciones), les negociaciones ente les dos formaciones pa la formación d’un gobiernu de coalición intensificáronse, pero l’alcuerdu nun llegó.

Les ufiertes

La ufierta última de los socialistes a la formación morada incluyía una vicepresidencia d’Asuntos Sociales y les carteres de Sanidá, Asuntos Sociales y Consumu, de Vivienda y Economía Social, y d’Igualdá. Mientres, la contraufierta fecha por Xuníes Podemos marcaba la vicepresidencia de Derechos Sociales y Igualdá, y los ministerios de Trabayu, de Sanidá y Consumu, y de Ciencies y Universidaes.

Sicasí, cola intención de salvar la situación, Iglesias, na so intervención na tribuna, propunxo al PSOE arrenunciar al Ministeriu de Trabayu a cambiu de tener competencies pa dirixir les polítiques actives d’emplegu. Adriana Lastra, poco depués, tamién dende la tribuna, refugó la propuesta apuntando que diches competencies taben tresferíes a les autonomíes, polo que Xuníes Podemos y les otres fuercies qu’amosaron la so postura favoratible a la creación d’un gobiernu d’izquierda astuviéronse, fracasando asina la investidura de Sánchez.

Na semeya, Sánchez a la so llegada al Congresu.

Contador Estadistiques