L'Anuariu de la Música Asturiana repasa'l 2015 nuna edición de baldre

|
Portada del Anuariu de la Música Asturiana 2015.jpg

Anabel Santiago protagoniza la portada del 2015, que tien como mayor novedá la so distribución de baldre. Como ye vezu, la revista inclúi un CD con una escoyeta de lo meyor qu'ufiertó la nuesa música mientres l'añu pasáu.

Goxe Producciones edita un añu más l'Anuariu de la Música Asturiana, espublización que repasa la producción musical del país. La música tradicional, el folk, el rock o la canción d’autor tienen protagonismu nesta revista con seiciones qu’inclúin reportaxes, informes, entrevistes, crítiques, opinión, cróniques, recoyida de material o anuncies.

Esti númberu incorpora dos informes del periodista Damián Barreiro, ex redautor d'Asturies.com, entitulaos 'Operación Tonada. Un repasu a la presencia de la canción asturiana nos medios audiovisuales' y 'De Luar a Isabel Pantoja. Formatos musicales nes televisiones autonómiques', amás d'un artículu sobre'l pasáu, presente y futuru del Premiu al Meyor Cantar, entituláu 'Les Asturies, 12 points'. Tamién entrevistes a Santiago y a Spanta la Xente, y delles collaboraciones, como la d'Alberto Álvarez Peña, que fala sobre’l romance de Galancina y les Fogueres de Nadal, o la de la graduada n’Historia y Ciencies de la Música, Toya Solís, que fala de la misa de gaita d’Asturies.

Mentés, el periodista Xicu Ariza, tamién ex redautor d'Asturies.com, fai un repasu de les producciones rockeres del añu, que protagonicen Misiva, La Tarrancha, Skontra y Bacotexo. Hai güecu nel Anuariu tamién pal comentariu de discos, como 'La fonda de Lola' d'Héctor Braga o'l recopilatoriu 'Bestiariu', editáu por Araz, y pa la opinión, con firmes como la d’Ismael Arias, Ignaciu Llope o Adolfo Camilo.

Zarra la espublización la seición 'Collecha', onde apaecen les producciones del añu 2015, un total de venticinco centraes fundamentalmente na tonada y el rock, "mui per debaxo de les d’hai unos años".

'Por una música asturiana viva'

L'editorial d'esti añu del Anuariu de la Música Asturiana, qu'apaez nel 'Entamu', entitulase 'Por una música asturiana viva' y céntrase na problemática de los conciertos en llocales. "Fai falta una llexislación clara y favorecedora d’esta realidá que, respetando los lóxicos derechos de vecinos y la normativa sobre ruíu, apoye que la música siga sonando nes nuestres cais, que los nuestros músicos y programadores nun se sientan persiguíos", demanda, pa darréu solicitar que los representantes políticos sían responsables y afronten los cambios necesarios pa iguar esta cuestión.

Goxe Producciones apuesta nesta ocasión por un formatu nuevu de revista, "más pequeñu y amañosu, anque sigue manteniendo una paxinación curiosa (80) y a tou color", asina como pol caltenimientu del CD colo meyor del 2015, compuestu por 16 pistes. El carauter gratuitu de la revista esti añu trátase d'un esfuerciu importante por parte de la empresa editora cola fin d'algamar una mayor difusión de la mesma "ente tolos aficionaos o interesaos na música d’espresión asturiana".

Y ello ye que l'Anuariu de la Música Asturiana 2015 finánciase "esclusivamente con publicidá y ensin ayuda institucional, al renunciar a la subvención a medios de comunicación pa la promoción del asturianu al considerala insuficiente pa con un proyectu como ésti, con dieciséis años de vida y una incidencia bultable nel panorama musical asturianu y n’asturianu".

Puntos de distribución

Los llugares onde los aficionaos van poder consiguir l'Anuariu son los siguientes: L’Esperteyu y La Llegra, n'Uviéu; Trisquel, Sestaferia y Paradiso, en Xixón; El Cafetón y El Cabanón, n'Avilés; Llibrería Palabras de Caramelo, en Candás; L’Abellugu y Habana, en Mieres; La Naveta, en Nava; Llibrería Asturias, en Tinéu; La Esbilla y Ringo Rango, en Villaviciosa; Cuévano, en La Pola Siero; El Sabil, en Villanueva (Santu Adrianu); y El Corquiéu, en Ribeseya. La revista y el CD van tar disponibles nestos puntos nos díes próximos.

Contador Estadistiques