Xune Elipe: “Nos años últimos nótase cierto agotamientu na escena folk”

Pese a los problemes de financiación qu’atopó Goxe Producciones pa editar l’Anuariu de la Música Asturiana, ésti yá ta disponible en llibreríes y chigres del país. El so responsable, Xune Elipe (Villalegre, 1962), faló con Asturies.com d’esti númberu y de la situación de la música del país, demandando un mayor compromisu por parte de la RTPA.

Un añu más, l’Anuariu de la Música Asturiana ye fiel a la cita.

El primer volume del A.M.A. salió nel 2000 y dende entós nun falló nengún añu. Surdió como una necesidá de la escena musical nel nuestru país y el tiempu demostró qu’asina yera. Dieciséis númberos depués la idea sigue siendo la mesma: dar cuenta de l’actividá musical asturiana, pero tamién teorizar sobre ella y, na midida de lo posible, facer propuestes y buscar soluciones pa la so problemática.

Esti añu la publicación ye de baldre. ¿A qué se debe esta novedá?

Hai que facer alcordanza de que los primeros númberos yá yeren gratuítos, agora retomamos esa idea col aquel de que tenga una mayor difusión. Mentanto podamos el nuestru enfotu ye que tenga esi calter. Lo que queremos ye llegar a cuanta más xente meyor y que lo que nós llamamos ‘música d’espresión asturiana’ (la tradicional, la que ta inspirada nella y toa aquella qu’emplegue l’asturianu o’l gallego-asturianu) s’esparda pel país lo máximo posible.

¿Tuvieron munchos problemes pa poder sacala alantre?

Pues la verdá que sí, hasta’l puntu de que peligró la so apaición. Nesti sen hai que dar les gracies, en primer llugar, al equipu que forma la redacción y a los collaboradores, y depués a los anunciantes privaos, que son los qu’aporten la so financiación; ensin ellos nun sería posible poder publicalu. Per otru llau hai que tirar de les oreyes a les alministraciones públiques, autonómica y municipales, que nun son conscientes de lo que supón pa la música asturiana poder contar con una publicación como ésta. Nesti sen, foi mui frustrante ver cómo dende determinaos estamentos del Gobiernu asturianu y de dalgún conceyu nun atendieron a les nuestres llamaes d’ayuda.

¿Caltién l’Anuariu la mesma estructura y conteníos que n’ediciones anteriores?

Lo primero que rescampla nesta entrega nueva ye’l so formatu, más pequeñu y amañosu. Creyemos que ye muncho más afayadizu y manexable. Otra manera, la estructura y temátiques siguen la llinia de siempre, esto ye, facemos un percorríu dende la tradición musical más estricta hasta los últimos soníos qu’empleguen la llingua asturiana. D’otra banda, el discu que lu acompaña ye un reflexu fiel del dinamismu y variedá qu’existe anguaño na nuestra escena musical, esti añu con un pesu bultable de los estilos más contemporáneos o rockeros.

Nel 2015 hebo un total de 25 producciones, «una cifra mui per debaxo de les d’hai unos años» ¿Por qué esti descensu?

Les causes son varies y distintes: dende la falta d’apoyu institucional real y continuáu nel tiempu –non escepcional y intermitente como foi–, hasta la baxada bultable de festivales qu’afalaren la ‘productividá’ de los grupos y solistes, pasando per una mengua curiosa nes ayudes a la edición o la falta de promoción...

¿Produzse en tolos estilos o en dalgunos concretos?

Nos últimos años sí que se nota cierto agotamientu na escena folk: hai menos producciones, surden menos bandes y los ‘clásicos’ paecen tomalo con muncha calma a la hora d’ufiertar trabayos nuevos. Pola contra, paez que’l rock n’asturianu va estabilizándose y les bandes qu’hai saquen coses nueves regularmente.

La editorial d’esti añu ta dedicada la música en direuto nos chigres. ¿Solucionaráse’l problema cola modificación de la llei qu’anunció’l Gobiernu?

Esperemos qu’asina seya. Nos últimos años l’actividá musical pasó per un cambiu na manera de rellacionase col públicu, volviendo como nun había tiempu a los conciertos de formatu pequeñu y cercanu. L’alministración tien que ser receptiva a esta tresformación y adaptar les sos regles llegales a ella.

¿Qué otres midíes son necesaries pa da-y un puxu a la música del país?

Seríen munches, pero voi quedar con una sola: la promoción al traviés de los medios de comunicación públicos. La RTPA nun pue ser ayena a esti fenómenu, y ello por dos cuestiones fundamentales: una pola calidá que tien la creación musical asturiana y, otra, porque ye la so obligación.

¿Ónde vamos poder atopar l’Anuariu?

Esti añu la so distribución foi bien curiosa, llegando a llugares como Uviéu, Xixón, Avilés, Candás, L’Entregu, Tinéu, Ribeseya, Villaviciosa, Castrillón, Nava, Santu Adrianu... En locales –fundamentalmente llibreríes y chigres– d’ellos tolos interesaos pues facese con un exemplar; eso sí, hasta que s’agoten.