L'Anuariu de la Música Asturiana 2018 defende la oficialidá pa crear texíu industrial cultural

Demanda al Gobiernu "una verdadera política ambiciosa y efectiva d'apoyu y promoción a esti sector". L-R protagoniza la portada.

L'editorial del Anuariu de la Música Asturiana 2018, revista autofinanciada editada por Goxe Producciones de repartu gratuitu, lleva'l nome de 'Vivir de la música asturiana' y céntrase nos ataques "a la futura oficialidá de la llingua asturiana y a la so rellación cola creación musical". "La oficialidá ye una oportunidá única pa, ente otres coses, promover y facilitar la creación de tou un texíu industrial de calter cultural onde la música ha xugar un papel perimportante. La creación musical n'asturianu (y gallego-asturianu) va vese beneficiada abondo cola reconocencia oficial de la llingua cola que trabaya. El Gobiernu asturianu, nesta etapa nueva que yá s'acolumbra, ha dexar les curties y acomplexaes acciones de calter inconexu y temporal y entamar una verdadera política ambiciosa y efectiva d'apoyu y promoción a esti sector", reza un cachu del testu.

Como ye vezu, esta espublización fai un repás a fondu a lo que dio de sí'l recién pasáu 2018 n'estilos como la música tradicional, el folk, el rock o la canción d'autor. Asina inclúi reportaxes, informes, entrevistes, crítiques, opinión, recoyida de material o anuncies.

La portada d'esti añu ta dedicada a L-R baxo'l títulu de 'La era post-folk llega a la música asturiana' y inclúi una entrevista al dúu. L'Anuariu tamién encuesta a Hevia sobre'l so trabayu 'Al son del Indiadnu' y al dúu ḷḷacianieguastu D'Urria, amás de dar espaciu a los reportaxes 'Gaites: una historia de ruíu, protesta y rock and roll' sobre la utilización iconoclasta y reivindicativa d'esi instrumentu y 'Avilés: capital folki d'Asturies', que repasa les ediciones últimes del Festival Intercélticu d'Avilés y Comarca, el Sol Celta y Seronda n'Avilés. 

Los informes que recueye son 'Teoría del pop llariegu', centráu en figures como La Pastorina, Vicente Díaz o Rodrigo Cuevas; 'La banda sonora pola oficialidá', alredor de los cantares de la reivinvidación llingüística; 'Los rockeros n'asturianu nun muerren', sobre les bandes rock qu'espublizaron discu nel 2018'; y 'Electrónica del país', que se fai ecu d'esta escena nueva, amás d'un especial sobre la política musical n'Asturies con propuestes de dellos representantes d'esti sector. L'Anuariu zárrase, como ye costume, cola sección 'Collecha', onde apaecen les producciones del 2018, 29 en total.

Ente los collaboradores d'esti númberu nuevu hai firmes como les de Damián Barreiro, Xicu Ariza, Xune Elipe, Alberto Álvarez Peña o Adolfo Camilo Díaz.

Discu recopilatoriu

El volume compleméntase con un discu onde se recueyen muestres de lo meyor qu'ufiertó l'añu, con diecinueve cortes repartíos n'estilos como la tonada, el folk, el rock, el pop o la canción d'autor, con artistes y grupos como Fruela 757, Ún de Grao, Anabel Santiago, Hevia, José Manuel Tejedor, Rubén Alba, Dixebra, Los Berrones, Bacotexo, La Tarrancha o Xaime Martínez. Tanto l'anuariu como'l discu van tar disponible nos díes proximos nos siguientes puntos de distribución:

• Avilés: El Cabanón y El Cafetón.
• Candás: La Barrica 13.
• L'Entregu: El Fielato y Casa Carmina.
• L'Infiestu: Casa Rural L'Ablanu y La Traviesa.
• La Felguera: L'Artesana y Matteria Creativa.
• La Pola Ḷḷena: Paralelo.
• La Pola Siero: Abrelatas y Cuévano.
• Ḷḷuarca: Camping Taurán.
• Mieres: La Llocura y L'Abellugu.
• Nava: La Naveta.
• Noreña: Copistería La Semeya.
• Ribeseya: Corquiéu.
• Uviéu: Manglar y L'Esperteyu.
• Villaviciosa: Banda Gaites Villaviciosa-El Gaitero.
• Xixón: Trisquel, Sestaferia, La Revoltosa, La Vida Alegre, Páramo, La Vaina, Paradiso y Sonidópolis.