L’Anuariu 2019 insiste na necesidá de “una verdadera política d’apoyu, promoción y salida de la música asturiana” dende les instituciones

Llan de Cubel protagoniza en solitariu la portada del Anuariu de la Música Asturiana 2019. Na so editorial, entitulada ‘De les bones palabres a los fechos’, celebra los aires nuevos na Conseyería de Cultura, pero insiste na necesidá de “una verdadera política d’apoyu, promoción y salida de la música asturiana”.

Goxe Producciones asoleya llegao xineru un añu más, nesta segunda dómina, l’Anuariu de la Música Asturiana, nel que repasa l’actividá del añu anterior, centrándose n’estilos como la música tradicional, el folk, el rock o la canción d’autor, con seiciones qu’inclúin reportaxes, informes, entrevistes, crítiques, opinión, recoyida de material o anuncies. Llan de Cubel, col asoleyamientu del so esperáu sestu discu, ‘La lluz encesa’, y una alcordanza del so miembru Elías García protagonicen el númberu correspondiente al 2019.

Baxo la direición de Xune Elipe y la redaición del propiu Elipe, Damián Barreiro y Xicu Ariza, a lo que se suma les collaboraciones d’Alberto Álvarez Peña, Ignaciu Llope, Lisardo Lombardía, Fernando Álvarez-Balbuena, Rafa R. Valdés y Adolfo Camilo Díaz, tamién s’atopen los reportaxes titulaos ‘Relevu xeneracional na música asturiana’, onde opinen delles de les promeses nueves del panorama sonoru, o ‘Tócala otra vez, ne’, sobre cómo inflúi la ficción audiovisual na promoción de les músiques autóctones; l’informe ‘Asturies, paraísu musical’, que trata de les rellaciones ente la música propia y la promoción turística; la crónica ‘Morrió’l celtismu, ¡puxa’l celtismu!’, en rellación al XX Seminariu d’Estudios Asturianos de la Fundación Belenos, dedicáu al celtismu musical; y entrevistes a Eva Tejedor, Silvia Quesada, Caldo y Os Rabizos y Cerezal. L’Anuariu zárrase, como siempre, cola seición ‘Collecha’, onde apaecen les producciones discográfiques del 2019, 35 en total.

La editorial d’esti añu centráse “nes espeutatives, a priori positives, que s’abren col equipu que ta al frente de la Conseyería de Cultura, Política Llingüística y Turismu, pero tamién fai alcordanza de que nestos venti años que lleva publicándose l’Anuariu les necesidaes y carencies de la escena musical asturiana siguen siendo les mesmes”, apunten dende Goxe Producciones. Asina, el testu ‘De les bones palabres a los fechos’ espresa que “lo realmente importante sigue ensin dase, esto ye, una verdadera política d’apoyu, promoción y salida de la música asturiana per parte de les instituciones públiques, fundamentalmente de la Conseyería de Cultura, que ye la que tien que diseñala, presupuestala y desarrollala. Paez que cuerren aires políticos nuevos, con responsables y cargos na alministración que son conscientes y conocen la problemática d’esti sector, polo que ye de cortesía dayos un tiempu p’analizar el so llabor, pero ello nun quita pa que-yos faigamos alcordanza de la problemática que tien esta estaya tan significativa de la Cultura Asturiana”.

Con discu y de baldre

Como ye vezu, l’Anuariu vien acompañáu d’un CD con una esbilla de les grabaciones del añu. Nesta ocasión inclúi 19 cortes de Xuacu Amieva & Dobra, Eladio Díaz Folk Ensemble, Salón Bombé, Caldo y Os Rabizos, Eva Tejedor & Les Pandereteres, Llan de Cubel, Muga, Slum Suit, Fruela 575, Luis Núñez y Los Folganzanes. Cerezal, Gente Terrible, Silvia Quesada, Nacho Vegas, Libre, Skama la Rede, Ilustres Patilludos, Guaja D y Pop Piquiñín.

Financiada esclusivamente con publicidá, esta revista y el discu repártense de baldre nos siguientes puntos: El Cabanón y El Cafetón, n’Avilés; L’Esperteyu y El Manglar, n’Uviéu; Sonidópolis, Sestaferia, La Revoltosa, La Vida Alegre, Páramo Bar, La Vaina, Paradiso y Trisquel, en Xixón; Barrica 13, en Candás; Paralelo Chigre Rock, en Ḷḷena; Camping Taurán, en Ḷḷuarca; El Fielato, en L’Entregu; L’Ablanu y La Traviesa, en L’Infiestu; L’Artesana y Matteria, en La Felguera; L’Abellugu y La Llocura, en Mieres; La Naveta, en Nava; Copistería La Semeya, en Noreña; El Corquiéu, en Ribeseya; y Abrelatas y El Cuévano, en Siero.