L’alumnáu de Llingua Asturiana de siete centros públicos sigue ensin poder recibir clase nesti cursu

Un “grave problema de planificación educativa”, en pallabres de SUATEA, provoca que l’alumnáu de siete centros del país matriculáu na materia de Llingua Asturiana siga ensin poder dar clase énte l’ausencia de profesores. Éstos tán asitiaos en L’Infiestu, Les Arriondes, La Puela, Cangas, Uviéu, Piedrasblancas y Grau.

La Conseyería d’Educación dio ayeri les axudicaciones de profesoráu interín, coles que nun se solucionó la situación na que s’atopen los escolinos d’estos institutos un mes y picu depués de comenzar el cursu. “Poro, un carretáu d’alumnáu qu’escoyó recibir esta materia ve conculcáu’l so llexítimu derechu como consecuencia d’una falta gravísima de planificación alministrativa dada la recurrencia del problema”, apunten dende’l Sindicatu Unitariu y Autónomu de Trabayadores de la Enseñanza d’Asturies (SUATEA).

“Magar qu’esisten llistes y bolses con profesoráu d’esta especialidá –la última bolsa constituyóse’l 27 payares del 2018 con diez persones–, les places nun son escoyíes. Ello débese a que les persones que les constitúin yá tán trabayando por otres especialidaes, tienen perspeutiva de garrar places más cerca casa –el 80% la población asturiana concéntrase nel centru d’Asturies y polo tanto col profesoráu pasa lo mesmo– o, fundamentalmente, porque les places ufiertaes son a media xornada amás de tar lloñe de la so residencia. Esto último trai como consecuencia unos gastos de tresporte, manutención y residencia que malpenes son a pagar col sueldu recibíu (unos 800 € netos)”, esplica’l sindicatu educativu, que tamién critica les poques places que s’ufierten pal master universitariu en Formación del Profesoráu d’ESO, Bachilleratu y Formación Profesional pola especialidá de Llingua Asturiana, 5 hasta l’añu pasáu, col compromisu d’amplialu a 10, yá ensin el requisitu de que nun se cursara por otra especialidá.

Dada la situación, SUATEA demanda, tal y como comunicaron los responsables del sindicatu a la conseyera Carmen Suárez Suárez nel aconceyamientu que tuvieron el llunes, un aumentu del númberu de places pal master y l’apertura de les bolses de personal interín d’esta especialidá a últimos de cada cursu “pa cuntar con más personal pal siguiente”; potenciar el minor de Filoloxía y la Mención nel Grau de Maestros; la creación de la especialidá docente d’asturianu y Gallego-asturiano; una merma significativa de les medies xornaes nesta y otres asignatures per aciu una bona planificación, sobre manera nes fasteres alloñaes del centru d’Asturies; y estabilidá de tol profesoráu interín de los centros rurales con contratos de llarga duración, “lo que valdría pa tener plantiyes estables nesos centros”.

Institutos afeutaos

Los centros afeutaos esti cursu por esta situación son El Sueve de Les Arriondes, el Centru Públicu d’Educación Básica (CPEB) de La Puela, el de Cangas del Narcea y el Centru d’Educación de Persones Adultes (CEPA) d’Uviéu, onde siguen ensin cubrise dende primeros de cursu cuatro vacantes pa tol añu a media xornada, y l’Isla de la Deva de Piedrasblacas, el Ramón Areces de Grau y el de L’Enregu, ensin maestros pa cubrir les sustituciones.

Na semeya, l'IES El Sueve de Les Arriondes.