Al menos 7 centros nun tienen profesor d’asturianu un mes depués del entamu de les clases

Lluces y solombres nesti comienzu del cursu escolar. Al menos 7 centros educativos de la rede pública nun tienen profesor de Llingua Asturiana un mes depués de que principiaren les clases, según tien constancia Iniciativa pol Asturianu, coleutivu que celebra un incrementu de la demanda de la materia ente l’alumnáu.

“La falta de profesoráu d’asturianu ta provocando qu’en más de 7 centros educativos públicos d’Asturies haya problemes cola asignatura de Llingua Asturiana. Ésta ye una realidá que se lleva repitiendo mientres dellos cursos y que nun camuda”, alerta Iván Llera, presidente d’Iniciativa pol Asturianu. Ún d’ellos ye l’IES de L'Infiestu, “onde propuxeron a los alumnos abandonar asturianu ya incorporase a otres asignatures”, dalgo que considera “inaceptable”.

Na so opinión, esta situación dase por una “mala planificación” que provoca que “se formara mui poca xente –nel Máster, especialidá d'asturianu– yá qu’únicamente la especialidá tenía 3-4 places, hasta que l'añu pasáu pasó a 10, tres la nuesa reclamación, pero de manera evidente sigue siendo insuficiente pol crecimientu de la demanda nos centros”. D’igual forma solicita “que se regularice la situación del profesoráu d'asturianu pa consiguir estabilidá na bolsa d’asturianu y evitar que los profesionales dexen esta bolsa y opten a otres asignatures, básicamente castellán, onde pueden sacar plaza”, y que s’entame una campaña “pa dar a conocer la demanda d'emplegu creciente qu'hai nesti campu”.

Tamién apuntó que “sería interesante que'l profesoráu con plaza fixa de castellán y formación como profesor d'asturianu puedan asumir hores –hailos en cuasi tolos centros– d’asturianu. Esto faise en dalgunos centros y podría suponer otra opción pa iguar esta situación de falta de profesoráu d’asturianu nun momentu nel que sigue medrando la demanda d’asturianu ente l’alumnáu de los centros”.

Por último considera “vital” que s'impulse la especialidá docente de Llingua Asturiana y Gallego-asturiano “pa permitir dignificar l'asignatura y respetar los drechos llaborales de los profesores”. Nesi sen, esixe que sía “una prioridá del nuevu Gobiernu d’España”.

Torgues a la matriculación n’Infantil

A últimos del mes pasáu Inaciativa pol Asturianu yá denunciara torgues a la matriculación en Llingua Asturiana n’Infantil. Asina, punxo d’exemplu’l casu d’un neñu que, magar tuviera matriculáu na materia, nun pue asistir a clase, casu que se fixo llegar a la Conseyería d’Educación de manera formal.

Na imaxe, les autoridaes, ente elles el presidente Adrián Barbón y la conseyera Carmen Suárez Suárez, xunto col alumnáu del IES de L'Infiestu, centru escoyíu pol Gobiernu pa celebrar l'actu d'inauguración del cursu. Semeya obra d'Armando Álvarez.