“La oficialidá tendría un coste d’ente 8 y 10 millones”, calcula Rivas

|
“La oficialidá tendría un coste d’ente 8 y 10 millones”, calcula Rivas

Esti miércoles celebróse la segunda sesión de les comparecencies informatives Comisión Especial d’Estudiu sobre'l Réxime de Proteición y Promoción del Asturianu. Nella participaron Próspero Morán, José Antonio Gómez Rodríguez, Ana Fernández García y David Rivas, que cifró’l coste de la oficialidá “ente 8 y 10 millones”.

El profesor nes árees d’Estructura Económica Mundial, Desarrollu Sostenible y América Llatina na Universidad Autónoma de Madrid recuperó na so intervención un estudiu aproximativu sobre’l coste que tendría la oficialidá que fixo nel añu 1997 tomando l’exemplu de Galicia –por consideralu’l más averáu a la nuesa realidá– pa les Xornaes Internacionales d’Estudiu de l’Academia de la Llingua Asturianu –que llevó a la Xunta Xeneral naquel momentu Izquierda Xunida–, adaptáu a los tiempos actuales. Pa ello, dividió l’estudiu en dos estayes: la educativa y la institucional.

Asina, na primera, calcula que “la oficialidá costaría al rodiu los 20 millones d’euros. Optimizando los recursos humanos, quedaríase en 15 millones”, esto ye, podría aforrase 5 millones. “El gastu institucional y social sería al rodiu los 6 millones. Polo tanto, sumaríense 21 millones. Bien, anguaño, Asturies yá presupuesta 5 millones d’euros” pa l’asturianu, “lo que quier dicir que’l coste adicional sería de 16 millones al añu. Eso representa’l 0,4 por cientu del presupuestu del últimu añu d’Asturies, o lo que ye lo mesmo, de cada 100 euros presupuestaos la oficialidá llevaría 40 céntimos. Nun paez mui caro salvar la llingua, cosa de la que taría mui d’alcuerdu conmigo la UNESCO si nos remitimos al informe qu’unvió a Asturies sobre la situación tan llamentable na que ta la llingua asturiana”.

Sicasí, recordó que’l coste de la oficialidá nun recai solo n’Asturies, yá que “toles comunidaes con llingua cooficial xunto al español reciben tresferencies”, ente elles pol coeficiente de pluralidá llingüística “al qu’Asturies arrenuncia por nun tener llingua oficial, porque cuando una llingua nun ye oficial, oficialmente nun esiste”. Según los cálculos aproximaos fechos por Rivas, el país debería de recibir “al rodiu de 8 millones d’euros”.

“Si lo llevamos al coste de la oficialidá calculáu previamente, taríamos nuna forqueta real de 8 a 10 millones d’euros per añu, esto ye’l 25 por cientu del presuestu”, polo que la oficialidá costaría a los asturianos “de cada 100 euros presupuestaos, 25 céntimos. A la UNESCO yá nun-y diba a paecer barato; como se diz pela cai, saldría tirao”, destacó Rivas.

Otres intervenciones

Amás del profesor de l’Autónoma, tamién participaron el periodista y profesor universitariu Próspero Morán; Gómez Rodríguez, Decanu de la Facultá de Filosofía y Lletres de la Universidá d’Uviéu; y Fernández García, profesora de Historia del Arte de la Universidá d’Uviéu, coles ausencies de Francisco José Llera Ramos y Ramón d’Andrés, qu’acudirán en próximes sesiones. Mentes, los representantes políticos que tomaron la pallabra foron Concha Masa (Izquierda Xunida), Andrés Fernández Vilanova ‘Ron’ (Podemos), Nicanor García Fernández (Ciudadanos) y Pedro de Rueda (PP), mentes que’l representante de Foro ausentóse nel so turnu y la socialista refugó intervenir.

Éstes foron les principales declaraciones de los comparecientes:

  • Próspero Morán: "L'asturianu nun se-y da nenguna oportunidá na radiotelevisión pública asturiana", "Cualquier procesu de normalización y dignificación pasa pola Universidá y los medios de comunicación de mases".
  • José A. Gómez Rodríquez: "Los problemes que tien el mínor d'asturianu ye que nun lu faen atractivu pa los y les estudiantes universitarios".
  • Ana Fernández García: "Cola llingua y el patrimoniu asturianu la estratexa n'Asturies ye que nun hai estratexa".

Pa siguir el desarrollu completu de la sesión, coles entrugues de los representantes políticos y les so intervenciones, pue consultar el Twitter d’Asturies.com.

Na semeya, Rivas, Morán y Gómez Rodríguez momentos enantes del comienzu de la sesión.

Contador Estadistiques