L’alcuerdu de gobiernu ente PSOE y Sumar trai una reducción de xornada a 37,5 hores selmanales ensin baxada de sueldu

Pedro Sánchez y Yolanda Díaz fixeron oficial esti martes l’alcuerdu de gobiernu nel casu de que’l socialista consiga los apoyos pa la so investidura como presidente del Executivu estatal. Ente les midíes pautaes ta la reducción de la xornada llaboral de 40 a 37,5 hores selmanales ensin que suponga una reducción salarial.

El Museo Reina Sofía foi’l llugar escoyíu pol PSOE y Sumar pa roblar esti alcuerdu reflexáu nun documentu de 48 páxines y 230 midíes entituláu ‘España avanza. Una nueva coalición de gobierno progresista’ xunto col logu de les dos formaciones. Ésti divídese en 11 estayes con delles propueste en caúna: ‘Una economía más moderna, al serviciu de les persones y d’un crecimientu xustu y sostenible’, ‘Más y meyores emplegos, con más derechos y meyores salarios’, ‘Una axenda verde pa garantizar la sostenibilidá de güei y de mañana’, ‘Una España qu’avanza en nuevos derechos sociales sociales pa un mayor bienestar’, ‘Garantizar el derechu a la vivienda y tresporte de calidá pa toos y toes’, ‘España, un referente feminista’, ‘Una España diversa y plural, con más derechos y más llibertaes’, ‘Una Fiscalidá xusta y adaptada a los retos del presente’, ‘Una alministración más áxil y una política territorial más xusta y eficaz’, ‘Cultura pa crecer en democracia’ y ‘Una España abierta al mundu y con voz propia nel escenariu internacional’.

Ente les midíes pautaes rescampla la qu’afita que “reduciremos la xornada llaboral máxima llegal ensin reducción salarial p'afitala en 37 hores y media selmanales”. L’aplicación de la mesma fadráse “de forma progresiva reduciéndose hasta les 38,5 hores nel 2024 y culminándose nel 2025”.

Otros aspeutos destacaos del alcuerdu son la estensión del “permisu de paternidá y maternidá hasta les 20 selmanes”, una revisión de “los gravámenes sobre la banca y les empreses enerxétiques col oxerivu de readaptalos y caltenelos una vegada que fine’l periodo d’aplicación actual pa qu’entrambos sectores sigan contribuyendo a la xusticia fiscal y al sostenimientu del estáu de bienestar” o que “el SMI siguirá creciendo a lo llargo de la llexislatura p’asegurar el poder adquisitivu, garantizándose nel Estatutu de los Trabayadores qu’aumentará acompasáu al 60 por cientu del salariu mediu”. Tamién la derogación de la nomada Llei Mordaza.

“Vamos ganar tiempu pa la vida”

“Esti alcuerdu ye pa tolos españoles. Pa los que votaron al PSOE y pa los que votaron Sumar; tamién pa los que votaron otres opciones pero comparten un deséu de progresu y de convivencia”, valoró Sánchez, qu’aseguró que “contamos col proyeutu, la ilusión, les idees y los equipos p’avanzar más y más rápidu. Y, llueu d’esta llexislatura última, contamos amás cola esperiencia de cooperar nun Gobiernu de coalición”.

Pela so parte, Díaz rescampló que “presentamos un alcuerdu que nun ye sólo un alcuerdu de gobiernu, ye sobre manera un alcuerdu cola ciudadanía”. “Sirve pa facenos más iguales, y cuando falamos d’igualdá falamos tamién de lliberta, de facenos más llibres”, añadió la líder de Sumar, qu’afirmó, cuando se refería a temes llaborales, que “vamos ganar tiempu pa la vida”.

Sánchez tien que siguir negociando coles diferentes formaciones polítiques con representación nel Congresu los apoyos suficientes pa resultar investíu presidente. De nun algamalo enantes del 27 de payares habría de convocase eleiciones, que se celebraríen el 14 de xineru.

Na semeya, Sánchez y Díaz roblen l'alcuerdu.