Felipe VI propón a Sánchez como candidatu a la Presidencia del Gobiernu estatal

El socialista va arrancar los contautos na so busca d'apoyos con Yolanda Díaz.

El rei d'España Felipe VI, nel so papel de xefe d'Estáu, propunxo a Pedro Sánchez como candidatu a la Presidencia del Gobiernu estatal. Fíxolo depués de finar la so ronda de consultes esta mañana col cabezaleru del PSOE y col del PP, Alberto Núñez Feijóo, que nun consiguiera salir investíu nel Plenu celebráu la selmana pasada.

Francina Armengol, presidenta del Congresu, compareció a les 14.30 hores p'anunciar la decisión del monarca de nomar a Sánchez pola so "disposición a ser candidatu nun procesu d'investidura nuevu", apuntaron dende la Casa del Rey. Una vez formulada la propuesta, la tamién socialista ha marcar la fecha d'un nuevu Plenu nel que Sánchez ha necesitar 176 sofitos nuna primer votación o una mayoría simple, na segunda.

Dende La Moncloa dio'l so parecer l'actual presidente en funciones, qu'apuntó que mañana va entamar colos contautos colos diferentes grupos parllamentarios cola esceción del de VOX. El primer aconceyamientu va ser con Díaz, líder de Sumar, pa entamar a zarrar unos apoyos qu'a lo último van depender de los votos necesarios de Junts y ERC, cola amnistía y el referéndum d'autodeterminación sobre la mesa como requisitos de los catalanes.

Nel casu de que'l 27 de payares nun hubiera entá presidente del Gobiernu estatal, convocaríense automáticamente eleiciones. La cita coles urnes sería'l 14 de xineru.

Na semeya, Armengol da anuncia nel Congresu de la decisión del xefe d'Estáu.