L'Academia de la Llingua ve nuevos avances del "espansionismu gallegu" n'Asturies

L'Academia de la Llingua Asturiana (ALLA) convocó ayeri una rueda de prensa pa denunciar lo qu'al paecer de la institución académica ye un pasu más na estratexa despansionismu galegu nel occidente d'Asturies. La celebración en Ribadeo pa últimos d'esti mes d'unes xornaes convocaes pola Universidá de Vigo y nes que van tratase les posibilidaes de promoción del gallegu nel occidente d'Asturies, según esplicó l'ALLA, que tuvo representada pola so presidenta Ana Cano y los académicos Carlos Lastra y Xosé Antón González Riaño, foi'l nuevu puntu de tensión que detectó l'Academia de la Llingua y que llevó a la institución a "llamentar que, si enantes yeren sectores del nacionalismu gallegu los qu'entamaben actos d'esti calter, agora ye'l mesmu gobiernu y instituciones académiques gallegues los que lo faen", según señala l'Academia de la Llingua, qu'identifica como militantes del Bloque Nacionalista Galego a los principales responsables de que se faigan estes xornaes, que vendríen a suponer un puntu más de roce pa l'ALLA dempués de l'aprebación del Plan de Normalización Sociollingüística del Gallegu, la creación d'una candidatura conxunta gallego-portuguesa énte la UNESCO enxertando nella territoriu asturianu o la intención del grupu socialista en Parlamentu Gallegu de financiá-yos viaxes a los habitantes del occidente d'Asturies a Galicia pa que se reconocieren na llingua y cultura gallegues.

D'otra manera l'ALLA identifica posiciones febles al respective de la reivindicación galleguista n'Asturies dientro del mesmu gobiernu asturianu. Ello ye que pa l'Academia, les declaraciones del presidente asturianu Vicente Álvarez Areces, nes que dicía que la reivindicación galleguista sobre'l Navia-Eo nun pasaba de ser una "anécdota" quedaron n'evidencia cuando, según esplicaron los representantes de l'Academia de la Llingua, "el mesmu director de la Oficina de Política Llingüística suxirió la galleguidá llingüística y cultural del occidente d'Asturies" en referencia a un artículu d'opinión firmáu pol mesmu Ramón d'Andrés qu'espublizó'l diariu "La Voz de Asturias".

Al rau de les declaraciones de d'Andrés l'ALLA emitió una entruga directa al Gobiernu asturianu al que-y solicitó qu'esplicare si de les declaraciones de d'Andrés ha entendese que'l Gobiernu asturianu camudó la so posición oficial sobre'l gallego-asturianu, que pa l'ALLA ye en cualquier casu una fala de transición con unes característiques específiques. L'ALLA, qu'entiende que la gravedá de la situación oblígala "a actuar tutelarmente" y demanda urxentemente una "declaración espresa solemne y inequívoca de la Xunta Xeneral del Principáu respective a l'asturianidá llingüística y cultural del occidente d'Asturies", a la que l'ALLA dixo que nun va renunciar.

L'Academia denunció tamién que tien que llamentar "la inconscencia de dellos sectores asturianos que llevaos por un análisis infantil y desesperáu tan dimpuestos a renunciar a l'asturianidá llingüística y cultural del Navia-Eo" cola idea, inxenua al paecer de l'ALLA, "de que en cuantes se declarare la oficialidá del gallegu nel occidente asturianu ello habría llevar automáticamente a declarar la del asturianu nel restu d'Asturies".