El PP insiste na Xunta Xeneral con una propuesta de resolución pa “rechazar la cooficialidad del bable”

|
Mercedes Fernández nel Alderique d'Orientación Política Xeneral

A pesar de que nel Alderique d'Orientación Política Xeneral del añu pasáu la Xunta Xeneral valtara una propuesta de resolución del PP pa “rechazar la cooficialidad del bable”, el partíu presidíu por Mercedes Fernández torna a insistir con una iniciativa idéntica. El vienres va votase na Cámara xunto con otros 181 pidimientos.

Los 17 votos en contra de Podemos (9), IX (5) y Foro (3) y l’astención del PSOE (14) refugaron el 17 de payares esta propuesta popular, que namái contó con 14 sofitos, los propios (11) y los de Ciudadanos (3). El PP ye la formación que más iniciatives propón: 44 de les 182 que se van votar mañana dende les 9 hores.

Entes les que presenta Izquierda Xunida (IX) ta una dedicada a la especialidá docente. Nella busca l’encamientu de la Xunta Xeneral al Conseyu de Gobiernu pa qu’esixa al Executivu estatal “la puesta en marcha inmediata de les xestiones necesaries pal reconocimientu de la especialidá docente de Llingua Asturiana, de mou que se pueda estabilizar la situación del profesoráu correspondiente nos centros educativos asturianos pal cursu 2019-20”.

Na imaxe, Mercedes Fernández mientres la so intervención na sesión del miércoles del Alderique d'Orientación Política Xeneral. Semeya obra de José Vallina.

Contador Estadistiques