La Xunta Xeneral condena les amenaces de muerte a l'alcaldesa y un edil d'IX en Riosa

|
Xunta Xeneral

L'Alderique d'Orientación Política Xeneral va celebrase los díes 23, 24 y 26 d'ochobre.

Tolos grupos parllamentarios de la Xunta Xeneral condenaron esta mañana les amenaces de muerte que recibieron nes selmanes últimes tanto l'alcaldesa Ana Isabel Díaz Fernández como l'edil José Manuel Pello, dambos d'Izquierda Xunida (IX). El conceyal atopó esta fin de selmana'l so coche rayáu coles lletres DEP (Descanse en Paz), fechu que llevó a la so compañera a confesar otra situación asemeyada.

Asina, relató como-y introduxeron nel so garaxe dos díes depués del funeral de Javier Ardines, conceyal d'IX asesináu de forma violenta, un papel col mensaxe "lo que pasó a tu compañero en Llanes no es nada comparado con lo que te puede pasar a ti". La Xunta Xeneral manifestó la so "enérxica condena a esti tipu de fechos y a cualesquier otros qu'atenten, de forma direuta o indireuta, al exerciciu de la política y contra la democracia, toda vez que se dirixen al conxuntu de la población, al entender que los cargos eleutos representen a tola ciudadanía, con independencia de la so filiación política o votu".

Otra manera, la Xunta de Voceros afitó les feches del Alderique d'Orientación Política Xeneral. Los díes 23, 24 y 26 d'ochobre'l Gobiernu va facer balance de la situación del país y los grupos parllamentarios van analizar la xestión y a formular propuestes que se van votar nel Parllamentu.

 

Contador Estadistiques