La muerte del conceyal d'IX en Llanes foi violenta

Javier Ardines González, edil de Mediu Rural, Playes y Personal, apaeció xunto al so vehículu con dellos golpes na cabeza.

L'ausencia nel so puestu de trabayu na mar depués de salir del so domiciliu na mañana d'ayeri disparó toles alarmes ente los sos familiares, qu'empezaron cola busca d'Ardines. Un vecín atopólu yá fináu na propia parroquia na que residía, en Pría, pocu tiempu depués.

El cuerpu del conceyal del únicu conceyal d'Izquierda Xunida (IX) en Llanes, de 52 años, presentaba dellos golpes na tiesta, polo que se sospechó dende un primer momentu d'una muerte violenta que confirmó güei l'autopsia que se realizó al cadabre. La Guardia Civil ta investigando nel entornu d'Ardines y manexa la posibilidá de que dalguna persona cortara'l pasu del camín que siguía habitualmente'l marineru pa dir al so puestu de trabayu cola intención d'atacalu nel momentu nel que saliera del vehículu.

IX de Llanes solicitó'l respetu a la privacidá de la familia nestos momentos duros y deseó un rápidu esclarecimientu de los fechos. IX Asturies suspendió tolos actos previstos pa güei nel país y destacó "la calidá humana de Javier Ardines, una persona bona, padre, esposu y güelu".

Semeya propiedá del Conceyu de Llanes.