La Xunta Xeneral acueye’l Plenu d’Investidura

Javier Fernández (FSA-PSOE), Mercedes Fernández (PP) y Emilio León (Podemos) intervinieron nel Plenu d’Investidura. León emplegó l’asturianu en parte del so discursu.

Abrió la sesión l’actual presidente del país en funciones, del PSOE, que pidió un alcuerdu de les trés fuercies d’izquierda, anque’l socialista criticó la “soberbia” de Podemos. Tamién defendió la necesidá d’un tiempu nuevu p’Asturies y afirmó que los casos Marea y Villa merecen una condena política, pero refugó una corrupción sistemática n’Alministración.

Pela so parte, la líder del PP criticó la xestión socialista nos 30 años últimos y reclamó maneres nueves de facer política, comprometiéndose cola tresparencia y el bon gobiernu. Na so intervención toco’l tema del asturianu nel enseñu, defendiendo dos bloques nes materies de llibre configuración autonómica en Primaria cola entrada de la LOMCE: ún de llingua y historia asturiana, y otru col segundu idioma estranxeru. Anguaño, la Conseyería d’Educación ufre la posibilidá d’escoyer ente Llingua Asturiana y Gallego-asturiano, nel so ámbitu, o Cultura Asturiana, colo que'l PP defende un empeoramientu inda mayor de la situación de la llingua asturiana nel sistema educativu.

León foi l’únicu de los trés candidatos a la presidencia del país qu’emplegó l’idioma nel so discursu. Nél afondó nos casos de corrupción que se vivieron recién y pidió a Izquierda Xunida que revise la so postura y pa que lu apoyara na votación. Tamién afitó’l so compromisu en contra de la incineradora ente un llistáu ampliu de propuestes.

Mañana, primer votación

Mañana va celebrase la segunda sesión del Plenu cola intervención del restu de grupos parllamentarios, pa depués entamar la votación. Si nengún de los trés candidatos algamara la mayoría absoluta, habría de dir a una segunda votación, el vienres, na que sería necesaria una mayoría simple.

Na semeya, un momentu de la intervención de León.