Héctor Piernavieja: “Un Gobiernu que xire les polítiques asturianes 180 graos ye posible”

Héctor Piernavieja Cachero (Mieres, 1990), de Podemos, ye’l diputáu más mozu de la Xunta Xeneral. Encargóse d’abrir la llexislatura emplegando l’asturianu, dalgo que va siguir faciendo nel futuru.

¿Cómo afronta la responsabilidá de ser diputáu?

Supongo que como cualquier persona normal na mio situación; ye una gran responsabilidá y, a vueltes, da vértigu, pero toi preparáu pa dar lo meyor de mi y  responder al enfotu de toles persones que sofitaron el nuestru proyectu.

Hai muncha xente detrás de les nueve persones que vamos tar dientro de la Xunta Xeneral con muncha formación y esperiencia, y eso da muncha seguranza

¿Qué va aportar Podemos a la dinámica del Parllamentu?

Vamos facer por averar el Parllamentu a la xente. Ye dalgo que yá tamos faciendo; paezme que nunca la xente fizo tantu siguimientu de la Xunta Xeneral.

Vamos facer que la xente sepa tolo que pasa ehí dientro. Yá diximos que nun entrábemos solos, sinón qu'entrabemos con más de 100.000 persones que sofitaron el proyectu. La nuestra aspiración ye que, pasu ente pasu, síamos munches más les persones qu’apostemos pol cambiu

Otra manera, vamos facer que nel Parllamentu se fale de la xente y los sos problemes. Tenemos representación abondo como pa poder facer que se fale de política social.

Paez que nun va ser posible qu'Emilio León algame la presidencia ¿Piensen que ye posible sacar alantre parte del so programa dende la oposición?

Los diferentes grupos van tener que se posicionar ente siguir estables como nes ultimes llexislatures de la FSA o apostar pol cambiu. Topamos un grau abondo altu de sintonía programática con Izquierda Xunida; xuntos tenemos el mesmu númberu d'escaños qu'el PSOE y 25.000 votos más

Un gobiernu que cambie les polítiques pa da-yos un xiru pa la xente ye posible y eso diba danos muncha más capacidá pa desendolcar el nuestru programa.

¿El ser el más mozu de la Xunta Xeneral marca de dalguna manera?

Paezme un síntoma democráticu perbonu que la mio xeneración podamos tar representaos na Xunta Xeneral. La mocedá n'Asturies siempre tuvo una situación mui mala, sobre manera cola ofensiva neolliberal de los últimos años, nos que parez que namás nos queda escoyer ente paru, precariedá o emigración forciada. Eso ye lo que me marca. Ye una reponsabilidá llevar la voz de la xeneración mozo al hemiciclu.

Nel restu d'aspectos, pa bien y pa mal, soi un diputau más de Podemos Asturies.

Nel Plenu de constitución de la Cámara encargóse de lleer los artículos del marcu llegal sobre les votaciones en llingua asturiana. ¿Qué lu llevó a ello? ¿Foi una iniciativa personal o una decisión del grupu?

En tolos movimientos nos que participé siempre defendí que hai que normalizar l’usu de la llingua asturiana en toles estayes de la vida. Depués de recibir la documentación del lletráu mayor, falelo col diputáu Andrés Ron –que ye l’otru diputáu más mozu de los 45– y a los dos paeciónos una idea mui bona.

¿Hebo dalguna torga o malestar ente’l restu de grupos por utilizar la llingua asturiana o portar una camiseta en defensa de la oficialidá, como vusté fixo?

Si la hubo, dame igual. Directamente, naide me dixo nada. Ye más, falar asturianu ye un derechu de toles persones d'Asturies.

En cuantes a lo de la camiseta, soi la mesma persona fuera del Parllamentu que dientro, y nun soi mui de traxe y corbata. Somos xente normal, faciendo política y polo tanto, siguimos siendo les mesmes persones.

¿L’emplegu de l’asturianu va tener continuidá o va ser anecdóticu?

La carta de l'UNESCO de los Derechos llingüisticos recueye que toles persones tienen el derechu d'escuchar falar a los sos representantes na so llingua.

Nel nuestru ADN ta la defensa de los derechos humanos y por eso voi facer les mios intervenciones nel parllamentu tantu n'asturianu como en castellán.

Parezme que pa normalizar la llingua ye importante que se sienta na Xunta Xeneral.

¿Hai posibilidá de meyorar l'estatus llegal del asturianu esta llexislatura o sacar alantre un Plan de Normalización o un reglamentu de la Llei d'Usu?

Asina lo recoyemos nel nuesu programa y hai dellos grupos políticos que tienen esta mesma voluntá nel so programa ellectoral. Nosotros vamos trabayar tolo posible pa que sia asina.

Parez que los 3/5 de la cámara que faen falta pa facer un Estatutu d'Autonomía nuevu que recueya la oficialidá del asturianu queden lloñe, polo que col resultáu eleutoral qu'hebo vamos trabayar muncho pa equiparar los derechos de castellanofalantes y asturfalantes.

¿Habrá Gobiernu de la FSA-PSOE en minoría o hai posibilidá de qu'IU o dalguna otra fuerza apoye al candidatu de Podemos?

Como comenté enantes, el trabayu que ficimos muestra que tenemos un altu grau de coincidencia programática con Izquierda Xunida y xuntos tenemos el mesmu numberu d'escaños y 25.000 votos más qu'el PSOE. Un Gobiernu que xire les polítiques asturianes 180 graos ye posible.

Pola nuestra parte, vamos trabayar tolo posible pa qu'esto sía una realidá

Quedaron solos defendiendo una mengua nes retribuciones de los diputaos. ¿Qué opinión-y merez la postura del restu de grupos parllamentarios?

Pa min ye una decepción que se quiera midir la dignidá de la Parllamentu pol salariu de diputaos y diputaes. Na mio opinión, lo que marca la dignidá de la Xunta Xeneral ye la dignidá de les polítiques que s’aprueben nella.

Poro, en Podemos apostamos por venceyar el salariu de diputaos y diputaes al del conxuntu de la población. Pa que los políticos cobren más, tienen que ser quien a ameyorar les condiciones de vida de la xente, asina ye bien cenciello: subir el Salariu Mínimu Interprofesional y diben cobrar más de los 1.950 euros que proponemos que, per otra parte, paecenme más que dignos.

Nesti sen, la propuesta que facíamos yera muncho más integral que les retribuciones. Tamién llevaba asignaciones a grupos parlamentarios y asesores. Ye una pena que de lo primero que se fale –y que xenere un consensu tan grande en tolos partíos menos en Podemos– sían estes coses.