La Xunta Pola Defensa detecta “nueves y graves contradicciones ente PSOE y FSA sobre la oficialidá”

La proposición non de llei aprobada la selmana pasada en Congresu de los Diputaos y na que'l PSOE emponderaba les virtúes del plurillingüismu y la cooficialidá d'idiomes nel estáu siguen dando que falar. La Xunta pola Defensa de la Llingua Asturiana, dempués d'analizar la postura del PSOE'l día en que se presentó la proposición nel diariu de sesiones del Congresu de los Diputaos, cree que la FSA "queda n'evidencia nun casu claru d'inmoralidá y fariseísmu políticu".

Si la Xunta pola Defensa de la Llingua Asturiana llamaba l'atención la selmana pasada sobre la doble moral de la Federación Socialista Asturiana por "defender en Madrid les postures xenerales del PSOE sobre los beneficios de la oficialidá de les llingües d'España, al empar que n'Asturies intentaba igualar oficialidá con imposición" la organización tuvo analizando les declaraciones de los diputaos que'l pasáu 7 de febreru debatieron la propuesta socialista. Los diputaos representantes del PSOE aquel día foron Ramón Jáuregui y Meritxel Batet, que, al dicir de la Xunta "defenderon les postures llingüístiques del PSOE a favor del pluralismu y la cooficialidá emplegando, nuevamente, argumentos radicalmente contrarios a los que gasta la FSA n'Asturies".


Esti ye'l casu de Ramón Jáuregui que dixo representando al PSOE que "les llingües nun tienen derechos, tienen polítiques que les favorecen" a lo qu'amestó que "Son los ciudadanos los que tienen los derechos" dalgo que lleva a la Xunta a entrugase "por qué n'Asturies los ciudadanos y ciudadanes que falen asturianu nun tienen los derechos que tienen los falantes de les otres llingües del estáu".


Les declaraciones de Ramón Jáuregui tamién recueyen l'afirmación de que "nes comunidaes onde hai dos llingües y les dos son oficiales el billingüismu ta asitiándose de manera natural progresando hasta llegar a un procesu integral". El representante del PSOE identificó igualmente llibertá nel terrén de les polítiques llingüístiques con que "cada ciudadanu tenga la llibertá d'escoyer y el derechu d'usar l'idioma oficial que-y pete" una afirmación ente la que la organización de defensa del idioma asturianu quier saber "Por qué n'Asturies nun podemos acceder a esa naturalidá billingüe" y "por qué n'Asturies la FSA diz que la oficialidá del asturianu diba suponer imposición y obligación cuando n'otres comunidaes ta suponiendo, según el PSOE llibertá y derechos".

Afondando na rellación ente billingüismu y llibertá, el diputáu del PSOE esplicó na cámara que "nun se-y esixe forzar a naide colos idiomes nin imponer un idioma sobre otru nin sancionar nin persiguir conducta llingüística nenguna porque ello supondría valtar derechos" dalgo que choca pa la Xunta cola situación n'Asturies, onde "la FSA defende que l'asturianu siga ensin reconocencia oficial y permite que los falantes d'asturianu suframos continues prohibiciones pal usu normal de la nuesa llingua, onde l'usu del asturianu ta prohibíu nes rellaciones coles alministraciones y onde los estudiantes asturianos, en miles de casos cada añu, nin siquiera pueden cursar una asignatura d'asturianu".

Otru tanto asocede coles declaraciones de la diputada socialista Meritxel Batet Lamaña, que dixo énte'l Congresu de los Diputaos que "el compromisu socialista foi y va ser el de ser estremadamente esixentes pa que naide pueda sentise discrimináu por razón de la llingua qu'emplegue". Pa la Xunta ello choca cola "discriminación a los asturianos, a los que se nos niega la igualdá de derechos que reconoz la Constitución".

Batet Lamaña faló tamién de que "nun podemos permitir crear problemes onde nun los hai. Adoptar una actitú histriónica nun va conducinos a o va provocar qu'acabe habiendo problemes." Una afirmación énte la que la Xunta ve inesplicable que la FSA permita que'l problema del asturianu, pal que más del 60% de los asturianos piden la so oficialidá, siga siendo un asuntu ensin zarrar.

La Xunta Pola Defensa de la Llingua remata afirmando que "la FSA tien muncho qu'esplicá-yos a los ciudadanos porque, si como diz el señor Jáuregui, los derechos nun los tienen les llingües sinón los ciudadanos, n'Asturies nesti momentu hai munchos miles de ciudadanos de segunda a los que nun se nos reconocen los nuesos derechos constitucionales".