La Xunta nun ve malu l'alcuerdu de gobiernu

Los puntos en referencia a llingua asturiana nel alcuerdu de gobiernu ente PSOE y Izquierda Xunida - Bloque por Asturies, qu'ayeri diemos a conocer en tolos sos términos n'Asturies.com tan alcontrando yá les primeres rocees. La Xunta Pola Defensa de la Llingua Asturiana foi esta mañana la primer organización asturianista d'importancia en facer valoración del alcuerdu ente dambes fuerces polítiques, y la evaluación de la Xunta nun ye precisamente emponderando l'alcuerdu.

Anque cola prudencia de reconocer qu'entovía nun conoz tolos datos y aspectos del alcuerdu de gobiernu en
materia de política llingüística, la Xunta diz que la valoración "nun pue ser otro que mui
negativa" en cuantes que "supón la decepción
y la frustración de les espectatives de meyores sustanciales na situación
de la llingua que s'esperaben d'esta negociación".

Pa la Xunta, los conteníos apautaos na negociación nun sedríen namás más que l'aplicación, en dellos
casos hasta restrictiva, de la Llei d'Usu. Al dicir de la Xunta nun esiste nengún compromisu concretu, más allá de les declaraciones
d'intenciones, sobre la necesidá de
la oficialidá, y ye que nel alcuerdu evítase espresamente la palabra
“oficialidᔠnon yá como un oxetivu que consiguir, sinón mesmamente como
una posibilidá que plantiar.

La falta de referencies a cambeos na Llei d'usu, la poca definición nes referencies al emplegu del asturianu na futura RTVAS son namás dos de les crítiques de la organización cívica a un documentu al qu'acusa de tener una redacción estrada d'indefiniciones, acusando una falta de concreción
particularmente grave nel puntu referíu a la definición y desenvolvimientu
d'un Plan de Normalización Sociollingüísticu, preséu fundamental que
quedaría n'opinión de la Xunta absolutamente ensin perfilar y, polo tanto, vaciu de conteníu y
sometíu a la voluntá del correspondiente conseyeru
del PSOE.

A nivel d'organigrama de gobiernu, la Xunta ve con preocupación que nun vaya haber, como se comentaba, una Dirección Xeneral de Política Llingüística con
entidá propio, sinón que dientro de Cultura va esistir una dirección con
otres funciones na que se incluye la llingüística. Entovía más gordo sedría'l que IX-BPA firmaren ensin asegurar siquiera que vayan controlar les árees
nes que se van tomar los determinos de política llingüística, polo que
se crearía un escenariu preocupante con un gobiernu que diba tener que
desenvolver unes polítiques nes que nun creye, dirixíu por un presidente
que tien demostrao
fobia a la llingua asturiana, un conseyeru o conseyera del aparatu del
PSOE y namás un técnicu coles manes ataes consensuáu ente PSOE y IX-BA na oficina de política
llingüística.


El
tratamientu que se-y da a la llingua nel sistema educativu nel documentu tampoco nun llama al entusiasmu de la Xunta, que critica que l'alcuerdu nun espeye la posibilidá de recibir clas n’asturianu y que tampoco nun algame nin los
mínimos prometíos pol responsable d’educación del PSOE, José Luis Iglesias
Riopedre, quien hai años llegó a proponer que l’asturianu fuere llingua
vehicular en delles asignatures.

En consecuencia, pa la Xunta esti alcuerdu nun supón nenguna meyora con respectu a les
polítiques de gobiernos en solitariu del PSOE, como'l de Trevín con Amelia
Valcarcel al frente de la Conseyería de Cultura, que tendría un programa
asemeyáu al qu'agora quier presentase como'l gran avance d'IU-BA nesta
negociación. Pa la Xunta IX-BA queda al firmar esti alcuerdu desautorizada pa ser la voz
de la defensa del asturianu nel Parlamentu porque lo que firmó nun contién nin los mínimos
necesarios pa facer una política llingüística qu'asegure la sobrevivencia
del asturianu. La Xunta acaba'l comunicáu pidiendo una renegociación de los términos del alcuerdu, del que diz que "nun cumple los mínimos".