La Xunta Eleutoral refuga un escritu n'asturianu y encamienta a presentalo "en idioma oficial"

Andecha Astur denúnciala "por incumplir la sentencia del Constitucional" que ganara nel 2000 pa poder usar l'idioma pa dirixise a esti organismu y solicita amparu a l'ALLA.

Paulo Arboleya, secretariu xeneral de la formación nacionalista, anunció ayeri esta decisión tres recibir una comunicación de la Xunta Eleutoral devolviendo-y un escritu presentáu por Andecha Astur na qu'especifica "que deberá presentarlo, en su caso, en idioma oficial". Esto ye, podría presentalo en gallegu, eusquera, catalán o castellanu, pero non n'asturianu n'Asturies.

"La Xunta Eleutoral nun desplica los argumentos o testos llegales nos que sofita tan sosprendente determín. Llama l’atención que ye la mesma Xunta que nesti procesu eleutoral d’abril yá aceutó otros escritos n’asturianu que presentemos, y ye la mesma Xunta que validó dafechu l’usu de les papeletes n’asturianu que distribúi Andecha Astur ente los sos votantes", comentó sorprendíu Arboleya. Nesi sen, recuerda que la formación nacionalista llogró nel añu 2000 que’l Tribunal Constitucional español "reconociere a tol pueblu asturianu’l so drechu a usar la llingua nacional nos procesos elleutorales (STC 48/2000). Dende entós Andecha Astur siempres se dirixó n’asturianu a la Xunta Eleutoral d’Asturies (comunicaciones, presentación de candidatures, papeletes de votu...)  y los sos escritos foron sistemáticamente aceutaos demientres los caberos 19 años".

"Nun pide una caxigalina"

"Creyemos que’l motivu pa que la Xunta Eleutoral camudare de criteriu, tres 19 años d’acatamientu de la sentencia del Tribunal Costitucional, ye de triba política", continúa'l secretariu xeneral, porque'l documentu refugáu "nun pide una caxigalina a la Xunta. Pide-y que notifique a les meses eleutorales la correcha interpretación de la llexisllación española pa que nun se produzan situaciones illegales comu les asocedíes nes caberes eleiciones españoles: retirada de papeletes d’Andecha Astur de les meses eleutorales, anulación de votos emitíos a favor d’Andecha Astur con papeletes impreses n’asturianu...", y non "cuestiones alministratives", como errores en datos o notificaciones de representantes, que sí acepta.

D'esta forma, Arboyela considera que la Xunta Eleutoral "nun va tomar iniciativa dala pa garantizar la presencia de papeletes d’Andecha Astur nes meses eleutorales, nin pa garantizar el valir de los votos emitíos n’asturianu a favor d’Andecha Astur. Ye dicir, l’Estáu español nun quier garantizar el derechu del pueblu asturianu a emplegar la so llingua nesti procesu eleutoral, drechu protexíu pol so propiu Tribunal Costitucional" nin a garantizar un "recuentu xustu, oxetivu y veraz". Poro, la formación nacionalista ta acabante recurrir énte la Xunta Eleutoral Central esta dicisión y "va emplegar tolos recursos posibles na defensa llegal de los drechos llingüísticos y políticos del pueblu asturianu".

D'igual forma, púnxose en contautu cola Academia de la Llingua Asturiana (ALLA), "institución del país encargada estatutariamente de curiar los drechos llingüísticos asturianos", pa pidi-y amparu. Asina, Arboleya solicitó ser recibida nel llar de la institución académica.