La Xira pola Oficialidá va facer les paraes próximes en Samartín del Rei Aurelio y Villaviciosa

Llueu d’arrancar en Bimenes n’abril y d’un parón por mor de les eleiciones y el branu, la Xira pola Oficialidá retoma la marcha pa concienciar sobre la necesidá del reconocimientu llegal de les llingües d'Asturies. La parada próxima va ser, del 16 al 20 d’esti mes, en Samartín del Rei Aurelio, pa siguir depués en Villaviciosa.

La Fundación Almastur y Iniciativa pol Asturianu entamen esta selmana d’actividaes al rodiu del asturianu en collaboración colos conceyos onde se desendolquen. La primer bona esperiencia anima a siguir y potenciar el proyeutu que resultó “más fácil d’organizar de lo que pensábamos, bien ye verdá que l’Ayuntamientu de Bimenes portóse mui bien y dionos toles facilidaes del mundu en cuanto a feches, espacios y disponibilidá de materiales propios”, espresa Carlos Rubiera, presidente del Patronatu de la primer organización.

“Paez que la iniciativa tien pinta de cuayar y de llegar a ser lo que pretende: una movilización amplia, social, a favor del derechu d’oficialidá que, como se ve, ye cada vez más imprescindible”, añadió’l cantante sobre una idea yá fecha realidá que va salir tamién fuera d’Asturies, a Madrid y a otros territorios con llingua propia, y que va tener la so parada próxima en Samartín del Rei Aurelio. En concreto, va entamase la Xira pola Oficialidá nesti conceyu de la cuenca d’El Nalón del 16 al 20 d’esti mes con una xornada dedicada al entamu y presencia del asturianu na enseñanza.

Va ser el martes 17 con protagonismu pal CP El Parque, de Blimea, ún de los centros pilotos que nel 1984 entamó a tener clase d’asturianu, y el CP El Bosquín, de L’Entregu, que nel cursu 2017-2018 participó nel Plan Pilotu esperimental de Promoción del Usu del Asturianu en cuartu de Primaria que facía vehicular l’idioma nuna materia. Enantes, el llunes, va proyeutase’l documental ‘De güeles a nietes. El retu de la tresmisión xeneracional del asturianu’, obra de Cuatro Gotes Producciones.

Un charra sobre toponimia ta prevista pal miércoles, mentes que’l xueves Inaciu Galán, d’Iniciativa pol Asturianu, va poner la charra ‘¿Por qué sí a la oficialidá del asturianu?’, na que va esplicar en qué consiste la oficialidá y qué implicaciones va tener. Un recital poéticu va servir pa poner el ramu al programa’l vienres.

Les actividaes de la Xira pola Oficialidá, que se van repartir ente Sotrondio y L’Entregu, complétense con dos esposiciones. Una ye 'Voces: la llingua n'Asturies al traviés de los sieglos', que yá tuviera en Bimenes, y la segunda trátase una muestra de cerca de mediu centenar de llibros básicos sobre l’asturianu qu’inclúi diccionarios, llibros de consulta y normativos, o traducciones al asturianu de grandes clásicos de la lliteratura.

En payares

Depués de la parada en Samartín del Rei Aurelio, Villaviciosa va ser el llugar próximu n’acoyer la Xira pola Oficialidá, con feches previstes del 6 al 10 de payares. Mieres y Cabranes son otros de los conceyos interesaos en recibir próximamente esta iniciativa que pretende percorrer los más de sitios d’Asturies.

Na semeya, Rubiera presenta una de les actividaes de la Xira pola Oficialidá na Casa Cultura de Santuyano.